Illersuisoq: Toqutsinermi ukiuni arfineq-pingasuni eqqartuussut nalinginnaasuunngilaq
Angut 28-nik ukiulik, niviarsiaqqamut aqqanilinnik ukiulimmut Aasianni siorna toqutsisutut ippassaq eqqartuunneqarpoq.
Taanna pineqaatissinneqarsimasunut ukiuni arfineq-pingasuni inissiisarfimmiissaaq. Tamanna sivisuallaartoq illersuisoq isumaqarpoq, suliassanngortitseqqinnissarlu isumaliuutigaa.
- Inuarnermi pineqaatissiineq nalinginnaasoq ukiunik arfinilinnik sivisussuseqartarpoq, taava meeraanera pillugu pineqaatissiineq sivisuneruvoq, tamanna uanga paasisinnaalluarpara. Kisianni ukiunik marlunnik sivisunerunera suliani taamaattuni nalinginnaasunit allaaneruvoq, angutip 28-nik ukiullip illersuisua, aamma nunatsinni illersuisuunerusoq, Finn Meinel KNR-mut oqarpoq.
Illersuisoq: Sullitara oqaloqatigissavara
Eqqartuunneqartoq niviarsiaqqamut nakuusersimasutut toqutsisimasutullu Ilulissani Qaasuitsup Eqqartuussisoqarfiani pisuutinneqarpoq. Illersuisup eqqartuussut suliassanngorteqqissanerlugu, ulluni 14-ini eqqarsarfissaqarnerminni eqqarsaatigeqqissaarniarpaa. Suliaq Nunatta Eqqartuussisuuneqarfianut suliassanngorteqqinneqarataannaavoq.
AAMMA ATUARUK Angut 28-nik ukiulik niviarsiaqqamik aqqanilinnik ukiulimmik toqutsisimasutut eqqartuunneqartoq
Eqqartuussutip suliassanngorteqqinnissaa sooq eqqarsaatigissavisiuk?
- Sivisussusiliineq pillugu tunngavilersuisoqarpoq. Taakkua sullitaralu nalilersorlugillu oqaloqatigiissutigissavagut. Uangali paasinninnera malillugu unnerluussut malillugu pineqaatissiisoqaraluartoq sakkortuallaarpoq, taamaattumik suliassanngortitseqqinnissara ilimanarneruvoq, Finn Meinel oqarpoq.
Unnerluussisussaatitaasut kissaataat aamma malinneqanngilaq. Taakkua angut ukiuni qulini pineqaatissinneqassasoq piumasarigaluarpaat.
Unnerluussisut piumasartik pinngilaat
Eqqartuussivik isumaqarpoq angut pissutissaqarani toqutsisoq, taava aamma taassuma inersimasuunera toqutaasullu meeraanera isummerneranni pingaaruteqarpoq.
Unnerluussisussaatitaasullu, Christian Halstadip, tamanna maluginiarpaa.
AAMMA ATUARUK Toqutsisutut pasisaq: Toqutsinissara siunertaanngilaq
- Pingaarnertut maluginiarpara eqqartuussiviup inuartoqarsimaneraanerput ilumoorneraraa, aamma eqqartuussiviup meeqqamik toqutsinerummat sakkortunerusutut maluginiarpaa. Kisianni pineqaatissinneqarsimasunut ukiuni qulini inissiisarfimmiititsinerusunnerput malinngilaat.
- Eqqartuussisut marluk ukiunik arfineq pingasunik eqqartuussisorlu ataaseq ukiunik arfineq marlunnik inerniliipput, taamaalilluni ukiut arfineq pingasuupput, Christian Halstad oqarpoq.
Tupaallattoq
Nunatsinni pinerluttulerinermik inatsik malillugu inuartoqarsimanerani pineqaatissiisarneq ukiunik arfinilinnik sivisussuseqarpoq.
Tamanna malinneqanngimmat illersuisup naammangisimaanngilaa aalajangiinerlu tupaallaatigaa.
- Kalaallit Nunaata Eqqartuussisuuneqarfianit eqqartuussutinit una sakkortuneruvoq, taamaattumik tupaallannarpoq, Finn Meinel oqarpoq.
