Illuatungiliuttut naalakkersuisoqatigiikkunnaartut pillugit: Tupaallaatissaanngilaq
Inuit Ataqatigiit Naleqqarlu ukioq ataasiunngitsorluunniit politikkikkut suleqatigeereerlutik suleqatigiinnerat ajalusoorpoq.
Naalakkersuisut siulittaasuata, Múte B. Egedep (IA) tassunga taarsiullugu Siumumit Erik Jensen nutaamik isumaqatigiissummik atsioqatigaa.
Aalajangernerlu taanna illuatungiliuttunut tupaallaatissaanngilaq.
AAMMA ATUARUK Naleqqap siulittaasua IA-kkunnik suleqateqarneq pillugu: Qanikkunnaariartornikuugatta
- Tupaallaatigillugulu tupaallaatiginngilara. Tamatta takusatsituut naalakkersuisoqatigiit aallartimmatali akunnerminni avissaartuunneq pinikuuvoq, isumaqatigiinnginnerit arlalissuit takunikuuavut, naalakkersuisoqarfiit nikerartut ilaalu ilanngullugit. Taamaammat suleqatigiinnerat pitsaasuunikuunngilaq, paasilluarsinnaavara taamaattumik Inuit Ataqatigiit immaqa allanik periarfissarsiorsimassappata, Demokraatinit, Jens-Frederik Nielsen Qanoruumut oqarpoq.
Naalakkersuisoqatigiit nutaat pillugit paasissutissat
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq.
Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.
Naleraq ullumikkumut pingasunik Naalakkersuisuutitaqaraluarpoq.
Taassumali partiini periarfissat ilaginngikkaat erseqqissaatigaa:
- Aap, Demokraatit immaqa ilisimaneqarpoq Demokraatit siunertarinngikkaat naalakkersuisoqatiginninnissaq aamma politikkikkut ungasippallaarujussuarnerput taanna ersarittorujussuuvoq, Jens-Frederik Nielsen oqarpoq.
Takusinnaakannereersimagai
Atassutip siulittaasuata Aqqalu Jerimiassenip nutaanik Naalakkersuisoqatigiilertoqalernera aamma tupaallaatiginngilaa.
- Aappaatigut tupaallaatigivallaanngilara, takusinnaakannereerakku iluminni arlaannik ingerlarpasinnerat tusagaqareernikuullunga, kisianni taamaattumik tupaallannartoqarpallaanngilaq, Aqqalu Jerimiassen oqarpoq, nangillunilu:
- Sukkavallaarsorinarsinnaavoq, kisianni aamma naalakkersuisut siulittaasuat allanngortitsisinnaanissaminik pisinnaatitaaffeqarpoq, taannalu aamma ataqqivara Naalakkersuisut siulittaasuat arlaatigut allanngorusussimaguni, peqqinnarnerusumik aalajangerusussimaguni taamannak iliuuseqarnerani.
Inuit Ataqatigiit Nalerarlu siorna qinersisoqarnerata kingorna naalakkersuisoqatigiinnissamik isumaqatigiissuteqarmata Atassut ikorfartortaalerpoq.
Atassulli Naalakkersuisuusimasunut ikortartortaanerminit novemberimi tunuarpoq illluttungiliuttunillu Demokraatinik suleqateqalerluni.
Pissaaneqarniukkunnaartut
Maannali naalakkersuisoqatigiilersut nutaat – tassa IA Siumullu tamatta sungiunniassavagut.
- Nunarput innuttaasullu pillugu naalakkersuisoqatigiinnissamik pilersitsivugut. Siumut IA-lu ukiorpassuarni isumaqatigiinngittarsimapput. Maannali ataatsimut pitsaanerpaaq pillugu suleqatigiissaagut, IA-p aamma Naalakkersuisut siulittaasuat Múte B. Egede ippassaq tusagassiortunik katersortitsinermi oqarpoq.
- Isumaqatigiinngittarnigut nukittorsaatigissavagut. Innuttaasut 66 procentiisa partiit marluk taakku qinernikuuaat, taanna nangilluni oqarpoq, taassumalu pissaaneqarniuunnerit maanna unissanerarpai.
AAMMA ATUARUK Siumup siulittaasua: Sapaatit akunnerata naanerani isumaqatiginninnialerpugut
Inuit Ataqatigiit Siumullu aatsaat siullermeerlutik naalakkersuisoqatigiilinngillat. Partiit taakku marluk 2016-imi aamma Naleraq peqatigalugu naalakkersuisoqatigiipput.
Naalakkersuisuuffiit kikkunnit inuttalerneqarnissaat ullumi kingusinnerusukkut saqqummiunneqassapput. IA-lli Naalakkersuisoqarfiit arfinillit tigummissagai Siumullu sisamanik Naalakkersuisuutitaqassasoq aalajangersimavoq.
