Illuatungiliuttut Peter Olsenimut tatiginninngitsut
Inatsisartuni tatiginninnginnermik taasititsiniaraluarneq naammasseqqammerpoq.
Illuatungiliuttut Demokraatit, Atassut Nalerarlu ilinniartitaanermut, kultureqarnermut, timersornermut ilageeqarnermullu naalakkersuisumut Peter Olsenimut (IA) tatiginninnginnermik taasititsinissamik siunnersuuteqarput.
Illuatungiliuttummi isumaqarput, Peter Olsen Qaqortumi Campus Kujallermut aningaasaliissutigineqartussatut missingersuutigineqartunit amerlavallaartunik aningaasaliisimanermut akisussaasoq. 2020-mi 2021-milu milliuunilikkuutaanik qaangiisimasut kukkunersiuinermut ataatsimiititaliap isumaliutissiissutaani takuneqarsinnaavoq.
- Revisionsudvalgip isumaliuutissiissutaa atuareerlugu kialluunniit qularutigisinnaanngilaa Ilinniartitaanermut, kultureqarnermut, Timersornermut Ilageqarnermullu Naalakkersuisoq Naalakkersuisutut akisussaaffini eqqortissimanngikkaa, Demokraatitnit, Atassummit Naleqqamiillu oqarput.
- Assersuutissat arlallit isumaliuutissiissummi innersuutigineqarput malittarisassat malinneqarsimannginnerat pillugu aammalu sukannersumik Ilinniartitaanermut, Kultureqarnermut, Timersornermut Ilageeqarnermullu Naalakkersuisoq isornartorsiorneqarpoq.
Illuatungiliuttunit tatiginninnginnermik taasititsiniarneq naalakkersuisoqatigiinnit akerlilerneqarpoq. Naalakkersuisoqatigiit taasititsinissamik pinngitsoortitsinissamik siunnersuuteqarput.
Inatsisartut tatiginninnginnermik taasititsinissamik pinngitsoortitsinissamut siunnersuut nalunaaqutaq 21.20 taasissutigaat. Inuit Ataqatigiit Siumullu taasititsinnginnissamik akuersipput, tassalu Peter Olsen naalakkersuisutut suli atuuffeqarpoq.
Kukkunersiuinermut ataatsimiititaliap isornartorsiuinermi sakkortussusaanut uuttortaat 1-iminngaanniit 9-moortoq atortarpaa.
Maanna ima isornartorsiuivoq.
- Aqutsinerlunneq pillugu sakkortusisamik isornartorsiuivugut.
Taamaalilluni isornartorsiuinerup sakkortussusaa normu 7-imiippoq.
Kukkunersiuinermut ataatsimiititaliap atortagaa aajuna:
Inatsisartuni ilaasortat kukkunersiuinermut ataatsimiititaliami ilaasortaapput. Pisortat aningaasaataat missingersuutaallu nakkutiginissaat ataatsimiititaliap suliassaraa. Campus Kujalliullu aningaasaqarnerata aqunneqarneranik sakkortusisamik maanna isornartorsiuivoq.
