Iluliarmiut Lyngvildip saqqummersitai pillugit: Torraqaat
Oqallinnerujussuarmik najummatsisimanartortalimmik pisoqareersorlu atisanik eqqumiitsuliorluni ilusilersuisartup Jim Lyngvildip puisip amii atorlugit assilisaasa saqqummersinneqarsinnaalerneri Ilulissani sapaatip akunnerata naanerani saqqummersinneqarput.
KNR-Imiit inuit Ilulissani najugallit eqqumiitsuliat pillugit qanoq isumaqarfigineraat apersoraavut:
Taakku ilagaat Pavia Skifte.
Assit qanoq isumaqarfigaagit?
- Assorsuaq kusanartuliorsimavoq, aatsaat taamak eqqumiitsulianik torrallataatigisunik takugunarpunga.
Sunartai taamak kusanartigigamik?
- Ammit suliarineri assut kusanarput, qalipaasersorneri ilusilersorsimanerilu kusanarluinnarput, ataqatigiissarsimavai kusanarluinnartumik, kusanarneroqqissinnaanngillat.
Inuit ilaasa suliai ajoraat saqqummiunneqartariaqanngitsutut isigaat, illit qanoq isumaqarpit?
- Taamatut inuit isornartorsiuinerat isumaqatiginngilara, inuk piginnaanilik piginnaanini atorlugu saqqummersitsili akueritigulu taava uagut isumassarsissaagut, puisi puisiuvoq, kulturi kulturiuvoq, isornartorsiuisut namminneq misilillugu eqqumiitsuliorlik.
"Oqallinneq inuiaqatigiinnut peqqinnartuuvoq"
Henriette Gabrielsenip danskip eqqumiitsuliortup suliai kusageqai
Assit qanoq isumaqarfigaagit?
- Assorsuaq kusanarluinnarput, inuusuttunut pilersitserusuttunut naleqqulluinnarput. Assit kusanarluinnarput ingammik avannaamiuulluni tulluusimaarnartuupput.
Sunaana kusannatigigaat?
- Assit tamarmik kusanarput inuusuttut arnat assilisittartutut atorneqarneri nuannarisaqaakka, tamanna nunarsuarmioqataanitsinnut ineriartornermullu uppernarsaataavoq.
Danmarkimi nunatsinnilu assorsuaq oqallinnermik pilersitsipput, ilaasa Jim Lyngvild isornartorsiorpaat ilaasalu nuannaraat, oqallinneq qanoq isumaqarfigaajuk?
- Ajunngilluinnarpoq, oqallinneq inuiaqatigiinnut peqqinnartuuvoq, ineriartoqqinnissamik pilersitsisarpoq.
"Ilusilersukkat tupinnarluinnarput"
Kathrine Noahsen Gundelip eqqumiitsuliat kusagai tamannalu ammit siunissami tunisaanerulernissaannik pilersitsissasoraa.
Saqqummersitsineq qanoq isumaqarfigaajuk?
- Assorsuaq kusanarput, suliarujussuarnik suliaqarsimavoq, nammineq periutsini atorluarsimavaa, torraqaarlu.
Katersugaasiviup ittua soraarsitaavoq, aammalu Jim Lyngvildip saqqummersitsinini unitsiinnarpaa, tamanna qanoq isumaqarfigaajuk?
- Pisut taamatut ilinerat tupaallaatigaara, maluginiartarparami katersugaasiviup ittua assut aallussilluartuusoq.
Oqallittoqarnera qanoq isumaqarfigaajuk?
- Taamaattoqarnerusariaqarpoq puisip amiisa avammut tunisaanerunissaat eqqarsaatigalugu aammalu piniartut eqqarsaatigalugit, Jim Lyngvildip puisip amiata qanoq iliorlugu nittarsaannerunissaanik takutippaatigut.
