Ilulissani politeeqarfiliortut
Ilulissani ikaartarfissuup, mittarfiup aqqutaaniittup, illoqarfiup nalunnginneqaatigisaata, avannaatungaani ulluni makkunani qaartitserisoqarpoq. Politeeqarfissaq pilersaarutit malillugit aappaagu decembarimi piariissaaq.
- Soorunami nuannaarutigisorujuuarput kiisami nutaamik politeeqarfittaarnissarput. Manna massakkut politeeqarfittut atugarput 1975-miilli politeeqarfittut atulernikoq ullutsinnut naleqqukkunnaarnikuugami, Ilulissani politikommissæri, Palu Eriksen KNR-mut oqarpoq.
Maanna politeeqarfiusoq politeeqarfittut atulinngikkallarami sannaviuvoq. Illutaa sannavittut 1960-kkut naalerneranni sananeqarpoq.
Naapertuutinngitsut
Nunatsinni politeeqarfiit arlallit sanaartukkanut maleruagassanut atuuttunut Inatsisinillu atuutsitsinermut ministereqarfiup politeeqarfiit nutaat qanoq iluseqarnissaannut ilitsersuutaanut naapertuutinngillat. Assersuutigalugu politeeqarfiit ilaanni atisaasiviit, perusuersartarfiit uffarfiillu naammaginanngillat silaannalullutillu, danskit politiivisa atuagassiaat, fagbladet dansk politi, ukiut sisamat matuma siornatigut taama allaaserisaqarpoq.
Politeeqarfissaq 730 kvadratmeterisut angitigissaaq, tassani piffissami aalajangersimasumi suliartortunut ineeqqat marluk ilaapput. Taassumalu saniatigut 160 kvadratmeterisut angitigisumik biilinut inissiisarfeqassaaq.
AAMMA ATUARUK Politeeqarfiit pitsanngorsaavigineqalersut
Ilulissani politeeqarfimmi sulisut tamarmik katillutik qulit missaanniipput. Taakkua ulluinnarni sulitillutik inissaaleqisartut, ittuat oqarpoq. Allaffeeqqat inuit arlariillutik suliffigisariaqartarpaat, tulluartumillu innuttaasunut oqaloqatiginnittarfeqaratik.
Politiit politeeqarfimmit 300-500 meterimik ungasissusilimmi, ilaqutariit illuanni, ilisimannittunik innuttaasunillu video-kkut oqaloqateqartarput.
Ilisimannittut ilaat politeeqarfimmi, allaffeeqqani suliffigineqanngitsuni apersorneqartariaqartarput.
Taamaattumik nutaamik sullivittaarnissartik qilanaaraat.
- Inissaqarnerulernikkut, soorunami aamma sullitatsinnut iseruminarnerusumik politeeqarfeqarnissaq pingaartikkatsigu, Palu Eriksen oqarpoq.
KJ Greenland tamakkiisumik sanaartortuuvoq, Danmarkimilu illuutinut aqutsisoqarfik, tassa Bygningsstyrelsen sanaartortitsisuulluni.
Ilulissani politeeqarfissap titartagartaa ataani takusinnaavat:
Assi: Masanti A/S
