Imigassat ammaqqimmata sapaatip akunnerata naanera politiinut ulapiffiuvoq

Tallimanngornermi taama nalunaaruteqarnerminnut atatillugu sapaatip akunnerata naanerani aamma ulapissallutik oqaatigaat.

Taama siulittuinertik eqquussimasoq, Kalaallit Nunaanni politiini pigaartut pisortaat Hans-Peter Berthelsen, sapaammi KNR-imit oqaloqatigineqarluni oqarpoq.

- Imigassat aalakoornartortallit tuniniagaanerisa inerteqqutaajunnaarnerat malunnarpoq, Hans-Peter Berthelsen oqarpoq.

Politiini pigaartut pisortaata ilanngullugu oqaluttuaraa, Kalaallit Nunaanni tamarmi arfininngornerup ullaassaani imigassartortoqarnerani angerlarsimaffinni eqqissiviilliornerit 16-it nalunaarutigineqartut, angerlarsimaffimmi eqqissiviilliorfiusumi ataatsimi meerartaqartut, aqqusinermi eqqissiviilliornerit arfinillit, silarlunnerujussua pillugu aalakoorlutik imminnut isumagisinnaanngitsut 17-it politiinit ikiorneqarsimallutik. 

AAMMA ATUARUK Politiit oqarasuaataannut siarnguttorpassuusut: Sapaatip akunnerata naanerani siarngutiinnavinnissaat ilimagaarput

Imigassartorsimasunik politiit ulapputeqarnerat arfininngornerni unnukkut sapaatillu ullaassaanni aamma pipput, politiini pigaartoq taama paasissutissiivoq.

Angerlarsimaffinni 14-ni eqqissiviilliortoqarpoq, angerlarsimaffinni eqqissiviilliorfiusuni sisamani meerartaqarput, aqqussinermi eqqissiviilliorneq ataaseq, imigassartorsimallutik aqqusinermi imminnut isumagisinnaanngitsut qulingiluat, imminnullu toqunnissaminnik siorasaarisut sisamat politiinut nalunaarutigineqarput.

Angerlarsimaffimmi meerartalimmi eqqissiviilliorneq imigassartorsimanermut attuumassuteqanngitsoq politiit KNR-imut taama oqarput.

Sapaatit akunnerata naanerani imigassartorsimallutik biilertut pingasut naammattoorneqarput.

- Imigassat ammaqqinneqaraangata ulapittuaannarpugut, imigassatorsimanermullu attuumassuteqartut amerlanerit sapaatit akunnerisa naanerini ulapputigisarlutigit, Kalaallit Nunaani politiini pigaartoq Hans-Peter Berthelsen taama oqarpoq.