Amerlerujussuartut: Inatsisaatsuliornikkut kinguneqartinneqanngitsumillu Viagrat nittartakkatigut pisiarineqartartut

Akitsuuserisut iisartakkat Viagrat tusindilikkaat arsaarinnissutigisarpaat. Iisartakkat nittartakkatigut piniarneqartarput nassiunneqartarlutillu. Taamaaliorneq inatsisinik unioqqutitsineruvoq, kisianni aamma ajornaatsuullunillu kinguneqartitsissutaaneq ajorpoq.

Viagrapiller, som er beslaglagt af toldfunktionen i Grønland.

Allattoq Teitur Larsen

februaarip 25-at 2023 10:10

Nutserisoq Connie Fontain

Iisartakkat tissannartut, Viagrat nunatsinni arsaarinnissutaasut amerlerujussuarput. Viagrat 130-it 2019-imi akitsuuserisunit arsaarinnissutigineqarput. Arsaarinnissutigineqartut 2020-mi 2.356-iupput.

Iisartakkat Viagrat arsaarinnissutigineqartut amerlassusaat tamatuma kingorna allanngorpallaanngilaq. 2022-mi arsaarinnissutigineqartut 2.265-iupput.

Iisartakkat arsaarinnissutaasut amerlingaatsiarnerat ersarissumik nassuiaatissaqartoq, Akitsuuserisut aqutsisuat, Uvdloriánguaĸ Hansen, oqarpoq.

- Viagranik nittartakkatigut pisinerup qanoq ajornaatsiginera inuit paasinikuuaat. Taamaammat piffissap sivikitsup ingerlanerani amerlingaatsiarput, taanna oqarpoq.

Nakorsamiiit akuersissummik allagaqartaqarnissamik piumasaqaatilinnik nittartakkatigut nakorsaatinik pisineq inerteqqutaavoq, taamaakkaluartorli kinguneqartitsissutigineqartarneri annikipput, Uvdloriánguaĸ Hansen nassuiaavoq.

- Iliuuserisinnaasatuarput tassaavoq mianersoqqussummik tunniussineq, ersarissumik oqaatigalugu inatsisit unioqqutinneqartut. Tassa iliuuserisinnaasatuarput, taanna oqarpoq.

Nakorsamiilli allagartaqaruit, atuisinnaaninnut uppernarsaammik takutitsisinnaallutit iisakkanik nassarlutik nunatsinnukarsinnaavutit.

Naak inatsisitigut kinguneqartitsissutaanngikkaluartoq nakorsaatit inatsisaatsuliornikkut pisiat peqqissutsimut kingunerluuteqarsinnaapput.

Iisartakkat tungujortut aqerloqartut

Viagra nakorsaataavoq atoqatigiinnermi usuup tissanniarneranik ajornartorsiuteqartunut iisartaganngorlugu tunniunneqartartoq.

Tissanniarnermik ajornartorsiuteqaruit nakorsamit allagatalerneqarlutit nakorsaataarniarfimmi Viagra pisinnnaavat.

Taamaakkaluartorli nunatsinni inuit iisartakkanik tissassaatinik nittartakkatigut pisiniartarput.

- Viagra nunat allat nittartagaatigut assigiinngitsutigut pisiarineqarsinnaavoq, nakorsaatillu ilaatigut Kinaminngaanneertarput. Aamma Danmarkimiit pisiarineqarsinnaavoq, Uvdloriánguaĸ Hansen oqarpoq.

Akitsuuserisut arsaarinnissutigisartagaat puussiami ataatsimi 20-t missaannik imaqartarput. Taakkulu inunnut ataasiakkaanuunerusoq nassiunneqartut arsaarinnissutaasarput.

Viagra suua?

- Viagra nakorsaataavoq iisartagaq tungujortumik qalipaateqarnerusarpoq.

- Viagrap tiinnermi tissanniarneq nalinginnaasoq sakkortusartarpaa, .

- Iisartagaq kissaatigisatut sunniunniissaa akunnermik ataatsimik sioqqutsilluni inneqartarpoq, akunnerillu sisamat missaanni sunniuteqartarluni.

- Inuit akunnerit sisamat ataavartumik tissaqqasarnerannik eqqarsartarneq paatsoorneruvoq. Viagrali tissanniarnermut kisimi iluaqutaasarpoq.

- Viagra iisartakkamik misiliisut 50-80 procentiinut iluaqutaasarpoq.

- Anguterpassuit inuunermi ingerlaneranni tissanniarneq ajornartorsiutigisinnaavaat. Tamanna aarlerinermik, uippakajaarnermik imaluunniit timikkut nappaateqarnermik – assersuutigalugu taqqanik milikartoorneq tissanniarnermut ajornartorsiuteqartitsisinnaasarpoq.

Paasissutissarsiffik: netdoktor.dk.

Allisiguk

Naak Viagra ikiaroornartuerniamit pisiarineqanngikkaluartoq, nittartakkatigulli uloriananngitsutut isikkoqarluni pisiarineqartaralurtoq, nakorsaat ulorianartunik akoqarsinnaasoq, Uvdloriánguaĸ Hansen nassuiaavoq.

- Nakorsaatit arsaarinnissutigisatta akui assigiinngitsuusarput. Assersuutigalugu nakorsaatini Viagramut assingusuni aqerlumik akulinnik nassaarnikuuvugut, taanna oqarpoq.

Aqerlumik akulimmik annertuumik iisiguit tamanna peqqissutsinnut kingunipiloqarsinnaavoq.

- Aamma akorisaata ilaat ajoqutaangitsutut isikkoqarsinnaagaluarlutik taamaattuaannnngillat. Nakorsaatinik nittartakkatigut pisineq mianersorfissalerujussuuvoq, Uvdloriánguaĸ Hansen oqarpoq.

Sooq Viagra inatsisaatsuliornikkut pisiarineqartarpa?

Akitsuuserisut nakorsaatinik nakorsamit allagartaqarfiusussanik arsaarinnissuteqartarnerat nutaarsiassaanngilaq. Nittartakkatigulli pisiniarnerup ajornannginnerulernera ilutigalugu nakorsaatit arsaarinnissutigineqartut amerlipput.

Soorli inuit inatsisaatsuliornikkut pisiniartarnersut akitsuuserisup ilisimanngilaa.

- Inuit sooq Viagranik pisiniartarnerat pillugu apersorneq ajorpagut. Arsaarinniinnartarpugut, Uvdloriánguaĸ Hansen oqarpoq, nangillunilu:

- Viagrap pisariaqartinneqarnera ataasiakkaanit nalilersugassaavoq. Viagranilli pisariaqartitsivikkuit nakorsamut attaveqassaatit.

Viagrat akitsuuserisunit ataatsikkut arsaarinnissutigineqartut amerlanerpaat 126-upput. Taakku nunatsinni najugaqartumit Nuup mittarfianut tikittumit arsaarinnissutigineqarput.

Nutaarsiassami kukkunermik nassaarsimaguit uunga allaffigineqarsinnaavugut.