Inatsisartut upernaakkut ataatsimiinissaat piariingajalarpoq

Inatsisartut upernaakkut ataatsimiinnissaannut pilersaarut piariipajaarpoq. Maannamut pilersaarutit naapertorlugit Inatsisartut Nuummi qaammatini marlunni katersuutissapput.

Allattoq Ivik Kristiansen

februaarip 26-at 2022 18:31

Inatsisartummi marsip ulluisa 21-annit maajip ulluisa 20-annut upernaakkut ataatsimiinnissaat maanna pilersaarutaavoq.

Inatsisartut siulittaasuat, Hans Enoksen (N), tusagassiuutinut nalunaarummi taama paasissutissiivoq.

Inatsisartunut ilaasortat immikkoortunik nutaanik 41-nik oqaluuserisassanngortitsipput, Naalakkersuisullu immikkoortunik nutaanik 22-nik oqaluuserisassanngortitsillutik.

Tamatumalu saniatigut aalajangiiffigisassatut siunnersuutit 17-it ukiakkut ataatsimiinnermit kinguartinneqartut oqaluuserisassanut ilanngunneqarput.

Inatsisartunulli qinikkat oqallinnissamik marsip ulluisa arfineq-aappaannut siunnersuuteqarsinnaapput, Naalakkersuisunullu ilaasortat iluarsiissutissanik ataatsimiinnissap aallartinnissaa sapaatit akunnerannik ataatsimik sioqqullugu qinnuteqarsinnaapput.

Taamaammat pilersaarut upernaakkut ataatsimiinneq marsip ulluisa 21-anni aallartippat allanngulaarsinnaassaaq.

Nutaarsiassami kukkunermik nassaarsimaguit uunga allaffigineqarsinnaavugut.