Inatsiseqarnermut ministeri: Nuummi sarfaarunnerup kingorna politiit upalungaarsimanerat patajaallisarneqartariaqanngilaq
Novembarip naalernerani Nuummi innaallagiaarunneq nal.ak. 18 missaannik sivisussusilik upalungaarsimanermik politiit akisussaaffigisaannik patajaallisaanissamik pisariaqartitsinngilaq.
Inatsiseqarnermut ministeri Nick Hækkerup folketingimut ilaasortamut Aaja Chemnitz Larsenimut (IA) taama oqarpoq.
- Nuannaarutigalugu paasivara Kalaallit Nunaata Politiivi Kalaallit Nunaanni oqartussat allat suleqatigalugit kinguneqarluartumik pikkorissumillu sulisimasut, taamalu Nuummi innaallagiaaruttooraluarnerup ajoqutaasumik kingunerisinnaasai annertunerpaamik killilersimaartinneqarlutik, inatsiseqarnermut ministeri apeqqummut akissummini taama allappoq.
29. novembari nalunaaqutaq 23-p missaani Nuummi innaallagiaaruppoq.
Nalunaaquttap akunnerini 19-ini nuummiutinnaallagiaqanngillat. Tamatuma kingunerisaanik inuit nalunaaquttap akunnerini arlalinni oqarasuaatitik angallattakkat atorsinnaasimanngilaat.
Nalunaaquttap akunneri qulingiluat qaangiummata marlunngorneq novembarip 30-ani nalunaaquttaq 08:00 Kalaallit Nunaanni Politiit aalajangerput politiit ilungersunartumik pisoqarnerani aqutsinermut ingerlatsivik aamma Kalaallit Nunaanni Upalungaarsimanemut Sulisui atulerniarlugit.
AAMMA ATUARUK Nuuummi nalunaaquttap akunnerpassuini innaallagiaqanngilaq
Aaja Chemnitz Larsen IA-meersoq apeqquteqarpoq naalakkersuisut danskillu Kalaallit Nunaanni oqartussaasuisa nalilerneraat innaallagiaarunnerup upalungaarsimanermik patajaallisaanissaq pisariaqartilersimaneraa?
Kisianni inatsiseqarnermut ministeri Nick Hækkerup isumaqarpoq tamanna pisariaqanngitsoq, allakkatigut folketingimut ilaasortamut akissummini taama allappoq.
- Pisoq upalungaarsimanermik politiinit akisusssaaffigineqartumik patajaallisaanissamut pisariaqartitsinngilaq, inatsiseqarnermut ministeri Nick Hækkerup allappoq.
Kalaallit Nunaata Politiivinit paasissutissanik naliliinernillu akissumminut atugassaminik pissarsisimavoq.
Politiinik naliliineq ingerlanneqartoq
- Pigaartut pisortaat novembarip 30-anut unnuaani aqaguani ullaakkut pisut malittaraat piffissaasukkullu aalajangiillutik upalungaarsimanermik sulineq aallartinniarlugu, Kalaallit Nunaanni Politiit nalunaarput.
- Sarfamik, oqarasuaatikkut angallattakkatigut internettikkullu attaveqarnermik amigaateqarneq piffissami tassani ima annertutigilerpoq pisoq ima ilungersunarsitigaluni politeeqarfimmit ataqatigiissaarneqartariaqalerluni.
Aamma nalunaarutigineqarpoq Kalaallit Nunaata Politiivi naammattunik sulisoqartut, pisariaqalernerani sukkasuumik suliartortunik.
Oqarasuaatit angallattakkat atorneqarsinnaajunnaarmata politiit sulisui immikkut aggertut illoqarfimmi angalaartinneqarput KNR-imut upalungaarsimaneq pillugu nalunaaruteqartarlutik qarasuaatinillu qaammataasakkut attaveqartunik Nuup avataani politeeqarfiit oqaloqatigisinnaalerlugit politiit akunnerminni IP-kkut oqarasuaataat attaveerutissagaluarpata.
Innaallagiaaruttoorneq sivisunerusimassagaluarpat danskit politiivi piareersimasimapput Kalaallit Nunaanni Politiit tapersersussalliugit den Nationale Operative Stab aqqutigalugu, Naalagaaffiup Politiivi inatsiseqarnermut ministerimut nalunarput.
Innaallagiaaruttoornerup ilungersunartorsititsinerata kingornatigut politiit sulinertik nalilersorpaat. Kisianni naliliineq suli naammassinngitsoq nalunaarutigineqarpoq
