Inatsiseqarnermut ministerip tunuarnera pissutaalluni ministerit Danmarkimi paarlaapput
Danmarkimi ministereqarfinni arlalinni ullumi paarlaattoqarpoq.
Inatsiseqarnermut ministerip Nick Hækkerupip ministeritut tunuarnera pissutaavoq, politikkikkullu ukiuni 20-ni sulereerluni politikkikkut maanna aamma suliunnaassaaq.
- Borgmesteritut, Folketingimi ilaasortatut ministeritullu ukiut 20-t sinnerlugit sulereerlunga assigiinngitsutigut sunniuteqarsinnaassutsiga allamut atorusuppara, Nick Hækkerup, Facebookikkut quppernermini ilaatigut allappoq.
Immiortut peqatigiiffianni Bryggeriforeningen i Danmarkimi maanna pisortanngussaaq.
Nunat allamiunut akuulersitsiniartarnermullu maannamut ministerip Mattias Tesfayep Nick Hækkerup inatsiseqarnermut ministeritut taarsissavaa.
Nunamut namminermut ineqarnermullu ministeri Kaare Dybvad, nunat allamiunut akuulersitsiniarnermullu maanna ministerinngussaaq.
Christian Rabjerg Madsen nutaatut ministerinngussaaq, nunamut namminermut ineqarnermullu ministerinngussalluni.
Ministerit nutaat dronningimut Danmarkimi ullaap tungaanut nalunaaqutaq qulinut ilisaritinneqarput.
