Qeqertarsuatsiaani imeqanngilaq: Inuit apummik aatsitsillutik imeqarput
Qeqertarsuatsiaarmiut sapaatiummalli imaarupput, inuillu apummik aatsitsisaqattaarlutik imermik imminnut pilersortariaqartarput.
- Ullaaq naapitama ilaat oqarput apummik aatsitsillutik imermik pissarsisarsimallutik, Qeqertarsuatsiaani nunaqarfimmi aqutsisuni siulittaasoq Ingvar Motzfeldt KNR-mut taama oqarpoq.
Nukissiorfiup nittartakkamini uppernarsarpaa Qeqertarsuatsiaani 180-t missaani inulimmi ruujorit ilaata qerrunnerata kingunerisaanik nunaqarfimmi imermik pilersuineq unissimasoq. Sapingisartillu tamaat atorlugu ajornartorsiut aaqqinniarlugu sulissutigigitsik erseqqissaatigaat.
Apummik aatsitsisariaqartut
Qeqertarsuatsiaani ulluni makkunani sila 20-t tikillugit issippoq, inuillu imeqarniarnermikkut ilungersuanerat misinnarluartoq Ingvar Motzfeldtip erseqqissaatigaa, Qeqertarsuatsiaarmiullu imermik pilersorniarlutik apummik aatsitsisariaqartartut.
- Inuit attaveqaataatigut innuttaasut allaqattaarput taamatut nalaataqarneq ilungersunarnerarlugu, soorunalimi tamatta ilungersorpugut, pisoq ilungersunarpoq, oqarpoq.
Taassuma aarleqqutigaa, imermik amigaateqarneq peqqutaalluni coronap siaruaateratarsinnaanera.
- TV-mi reklamemi takujuaannarparput eqqiluisaaqqusinerit, eqqiluisaarnerlu eqqarsaatigalugu ilungersunarpoq kuutsitsisinnaanngilagummi. Ingvar Motzfeldt oqarpoq.
Isumannaallisaaneq eqqugaavoq
Isumannaallisaaneq aamma eqqugaavoq, ikuallattoqariataassagaluarpammi qatserisartut imeq pinngitsoorsinnaanngilaat.
- Sillimaniarneq eqqarsaatigalugu qanoq pisoqassagaluarpat ilungersunartorujssuarmiittussaassuugut, tassa ikuallattoqariataassappat. Taamaammat maani qatserisartut tasersuaq putuaat sillimmatitut atussamaarlugu, soorunami neriuppugut taama pisoqassanngitsoq kisianni sillimaniarneq eqqarsaatigalugu tasersuaq putuneqarpoq, Ingvar Motzfeldt oqarpoq.
Nukissiorfiit allakkatigut akipput, naatsorsuutigigitsik unnuup ingerlanerani Qeqertarsuatsiaani imeqaleqqissasoq.
Qeqertarsuatsiaani atuarfik meeqqerivillu nunaqarfiup imeqannginnera pissutigalugu aamma marlunngornermi matuneqarput.
