Canadami nunap inoqqaavi inuit timaannik nassaareernerup kingorna akissutissaserusuttut
Canadami nunap inoqqaavisa atuarfinni najugaqarfiutigisartuni aalajangersimasuni inuit timaannik toqungasunik atatsimut ilisisoqarsimanersoq pillugu misissuinissaq kaammattuutigaat.
Meeqqat Canadami nunap inoqqaavineersut toqungasut timaat 215-it Kamloops Indian Residential Schoolip eqqani sapaatit akunnerata siuliani sisamanngormat nassaarnerup kingorna kaammattuipput.
Meeqqat ilaat pingasunik ukioqarlutik toqusimapput, timaannillu nassaarneq nunap innuttaasuinit tupassutigineqaqaaq.
Canadap naalakkersuisui erseqqissumik qulaajaasariaqartut, nunap inoqqaavinut ilaannut suliniaqatigiiffimmi Assembly of First Nationsimi siuttoq, Perry Bellegarde, isumaqarpoq.
- Ataatsimut taama ilisisoqartarsimasoq meeqqallu periarfeerunneqartartut, atuarfinni najugaqarfiutigisartuni atuartuusimasut ukiorpassuarni oqaluttuartaraluarput. Oqaluttuaalli upperineqartarsimanngillat, Bellegarde CBC-mut oqarpoq.
- Atuarfinnit taakkunanit aniguisimasut oqaluttuaat upperiumaneqartarsimanngilaq.
Meeqqat pinngitsaaliissummik angajoqqaaviniit arsaagaasarsimapput
Aniguisimasut ilaqutaasullu pisimasunik ilisimasaqarnissaat naleqquttoq, Bellegard The Globe and Mail naapertorlugu oqarpoq.
Canadami nunap inoqqaavisa ilaat Tkemplusps te secwelpemcikkut atuarfinni taamaattunni Canadami annersaajusimasup Kamloops Indian Residential Schoolip eqqaani nassaarsimallutik sisamanngormat nalunaartuupput.
Atuarfiit taamaattut nunap inoqqaavisa meerartaannut immikkut atuarfiusimapput. Atuartut kinaassutsiminnik ileqquminnillu atuiunnaarlutik, kitaamiut inooriaasiannut tulluarsarnissaat siunertaavoq.
Atuarfiit taamaattut Canadami immikkut aaqqissuussinermut ilaapput, atuarfiillu meeqqat angajoqqaaminniit pinngitsaalisaallutik arsaagaallutik najugaqarfigisagaat ukiuni 1831-miit 1996-ip tungaanut ingerlapput.
Atuarfinni taakkunani atornerluisoqartarsimasoq, peqqinnanngitsumik nerisitsisoqartarsimasoq atuarfinnilu kinguaassiuutitigut pinngitsaaliisoqartarsimasoq, misissuinissamut ataatsimiititaliarsuup 2015-mi misissuinermini paasivaa, Ritzauillu allaaserisaa naapertorlugu, aaqqissuussaq inuiaat kulturiannik nungusaanertut taallugu.
Trudeau: Ilumoortup ilisimanissaa pingaaruteqarpoq
Ataatsimiititaliarsuup misissiunermini aamma paasivaa, meeqqat 4.100-it atuarfinni atornerlunneqarnermi paarinerlugaanermilu kingorna toqusimasut. Takkulu amerlanerujussuusinnaasut oqaatigineqarpoq.
CBC-mi oqaluttuarineqarpoq, Canadami najugaqarfigiitigalutik atuarfiit taamaattut ikinnerpaamik 130-usut taavalu nunap inoqqaaavisa meerartaat 150.000-it atuarfinnut tamakkununnga allatsimasassut.
Atuarfimmi najugaqarfigiitigineqartartumi Kamloops Indian Schoolimi meeqqat 500-sinnnaapput.
Meeqqat 50-iinnaat atuarfimmi tassani toqusisutut pisortatigoortumik nalunaarsorsimapput.
Atuarfinni assaanissat ilumoortup ilisimanissaanut pingaaruteqartut ministeriunerup Justin Trudeauip erseqqissaatigaa.
