Inuuna tallimanik ukiulik Sverigemi DM-erluni guldinnatoq
Inuuna Olsvig tanngassimaaqisoq ullaap tungaa KNR-imit oqaloqatigaarput.
Taanna ujakkaarnermi DM-ernermi Sverigemi ingerlanneqartumi anaanani ingiaqatigalugu unammigiarpoq, maannamullu guldinik pingasunik ujaminnareerpoq, sulilu ataaseriarluni unammeqqittussaalluni.
Foto: Miiannguaq Olsvig
Taanna unammisunit nukarlersaavoq ukioqanngitsuniit arfinillit ukiullit tikillugit kisiartaarluni peqataavoq. Taamaammallu angajullernik tassa qulingiluat tikilugit ukiulinnik peqateqarluni aallartarrpoq.
Inuuna marlunnik ujaminnalluni nuannerpa?
- Aap, kisianni aamma kiatimma ataanukaraangata nillerilaartarakku.
Tallimaannarnik ukiulik, Inuuna Olsvig oqaluttuarpoq.
Kalaallit Danskillu ujakkaartartut Sverigimi unammiuaaruttulerput, taakku pingasunngornermiit arfininngorneq ilanngullugu unammissapput.
Inuuna suli ataaseriarluni unammeqqissaaq. Taanna Norgemi ukiut marluk matuma siorna DM-ertoqarmat pingasuinnarnik ukioqarluni nunarput sinnerlugu unammeqataaqqaarnikuuvoq.
AAMMA ATUARUK Inuuna på tre år deltog til DM i langrend
Inuuna Olsvigip anaanaa Miannguaq Olsvig taamani paninni DM-imut peqataanissaa anguniarlugu aningaasanik katersinikuuvoq.
Taanna pingasuinnarnik ukioqarluni ujaminik arfinilinnik angerlaassaqarluni nunatsinnut uterpoq. Taakkunannga ataaseq guldiulluni.
Tamatumuuna unamminerit marluk tamarmik guldinnaffigereerpai.
- Nuanneqaaq. Inuttaa aamma nuannaartarnermut, anaanaalluni attortisimanalaartarpoq qiasunngunarluni. Nuanneq.
Inuuna ataatsimik ukioqarluni arfinilinnillu qaammateqarluni ujakkaartalerpoq. Taassuma ujarkaartarnini pingaarteqalugulu nuannareqimmagu anaanaata tapersersortuartarinni oqaluttuaraa. Assersuutigalugu silagitsillugu sungiusariartittuaanarnissaa pingaartittarpaa.
Ukioq manna DM-ertoqarnissaa Norgemi ingerlanneqartussaagaluarpoq, Norgemili aputikippallaarnera peqqutigalugu, unamminissaq Sverigemut nuunneqarpoq. Inuuna Olsvigip DM-eriartarnera anaanata Miiannguaq Olsvigip nammineq isumagisarpaa.
