Inuusuttut imernerujussuat pillugu innersuussutit nutaat pilersinnerisigut ministeri annertuumik ernummateqarpoq
Peqqinnissamut ministeri Magnus Heunicke (S) inuusuttuaqqat aalakoornartutornerujussuat pillugu annertuumik ernummateqarpoq. Taamaattumik danskit naalakkersuisuisa peqqinnissaq pillugu aaqqissuusseqqinnissakkut inuusuttuaqqat ernguttarnermik ileqquat ilaatigut allanngortinniarpaat.
Magnus Heunicke taama oqarpoq, ataasinngormat aalakoornartoq pillugu Sundhedsstyrelsen (Peqqinnissamut Aqutsisoqarfik) innersuussutinik nutaanik saqqummiussimmat. Aqutsisoqarfiup massakkut kajumissaarutigaat inuusuttuaqqat 18-iliinikuunngitsut aalakoornartutortassanngitsut.
- Annertuumik ernumanartuuvoq danskit meerartaat inuusuttuarartaallu erngunnermut suli Europami pissartaammmata, ministeri allakkatigut oqaaseqaammi oqarpoq.
- Pingaartumik massakkut Peqqinnissamut Aqutsisoqarfiup innersuussutitit sakkortusarmatigit inuillu 18-iliinikuunngitsut aalakoornartutunngivittarnissaat innersuussutigalugu, ilimaneqarmammi meeqqat inuusuttuaqqallu aalakoornartup sunniutaanit ajoqutaasunit ajortianerummata.
Ministerip itisiliisinnissaa ajornarpoq,massakkorpiaq angalammat.
Sundhedsstyrelsen (Peqqinnissamut Aqutsisoqarfik) naapertorlugu innersuussutip allanngortinneranut inuusutsilluni aalakoornartup qaratsamik qanoq ajoqusiisarnera pillugu nutaanik ilisimasaqarlerneq pissutaavoq.
Ajoquserneqartartut ilaatigut tassaapput eqqaamasaqarneq, ilikkagaqarsinnaaneq, pilersaarusiorsinnaaneq, aalajangiisinnaaneq, isumassarseriataarnermik aqutsisinnaaneq aamma oqaatsit.
Danskit naalakkersuisui neriorsuipput marsi naatinnagu peqqinnissamut aaqqissuusseqqinnermut nutaamut siunnersuusiorniarlutik. Tassanilu naalakkersuisut taakku innutaasuni nukarliunerusut akornanni ernguttarnermik ileqqoq ilannguppaat.
Innersuussutini n utaani aamma politikerit ilanngunnissat piumasaqaataavoq. Suliniaqatigiiffimmi Alkohol & Samfund-imi pisortaq Ida Fabricius Bruun taama oqarpoq.
- Suliatigut ilisimasalinnit innersuussut aqqutigalugu inuusuttuaqqat imertalernissaasa kignuartinneqarnissannik aallaaviusinnaavoq, atuineq minnerulersillugu siunissami kinguaariit ikinnerusumik ajunaartoqartarnissaat aalakoornartumillu annikinnerusumik ajoqusermissaat qulakkeerlugu, allakkatigut oqaaseqaami taama oqarpoq.
- Kisianni soorunami angajoqqaat innersuussutit ilisimagaat pisariaqarpoq, inatsiliornerpullu malinnaasoq.
Tikkuarpaa inuusuttuaqqanut ilaatigut pisiniarfissuarni aalakoornartusinissaq ajornassasoq.
Ullumikkut meeqqat inuusuttuaqqallu 16 inorlugit ukiullit aallakoornartunik 16,5 procentinit annikinnerusunik aalakoornartortalinnik pisisinnaapput. Assersuutigalugu tassaapput viinnit immiaaqqallu. Kimittuni assigisaannillu pisiniaraani 18-ileereersimasariaqarpoq.
