Iran: Atomimik qaartartorsualiorsinnaavugut
Iranip atomimik qaartartorsaliorsinnaanissamut teknikkikkut periarfissaqarpoq. Taamaattumilli qaartartorsualiorniarnerluni suli aalajanginngilaa.
Iranimi upperisarsiornermi qullersap ayatollah Ali Khameneip siunnersortaa Kamal Kharrazi, tv-qarfimmut Al-Jazeeramut taama oqarpoq.
USA-p præsidentia Joe Biden, Israelimut Saudi-Arabiamullu ulluni sisamani tikeraareernerata aqaguani taama oqarpoq. Iranip atomip nukinganik atuisinnnaanera oqaluuserineqartut pingaarnerit ilaanniippoq.
Kharrazip oqaasii uissuumminartortaqarput, Iranimmi atomimik qaartartorsualiorniarnissamik soqutigisaqanngitsoq Iranip siusinnerusukkut erseqqissaatiginikuuaa.
- Urani ullualuit ingerlaneranni 60 procentimik atorsinnaanngorsarsinnaasimavarput, 90 procentimillu atorsinnaanngorsarneqarsinnaanissaa ajornanngitsumik angusinnaavarput. Iranip atomimik qaartartorsualiornissamut teknikkikkut periarfissaqarpoq. Tamannali pillugu Iranimi suli aalajangertoqanngilaq, taanna Al-Jazeeramut oqarpoq.
Iranip urani atortut immikkuullarissut atorlugit 60 procentimik atorsinnaanngorsarsimavaa.
Uranip annerpaamik 3,7 procentimik atorsinnaanngorsarneqarsinnaanissaa, Iranip, USA-mik nunallu pissaanilissuit allat peqatigalugit 2015-imi isumaqatigiissusiorfigigaluarpaa.
Uranip 90 procentimik atorsinnaanngorsarneqarpat atomimik qaartartorsualiortoqarsinnaalertarpoq.
USA-p præsidenterisimasaata Donald Trumpip, USA isumaqatigiissummit 2018-imi anisippaa. Trump taarsiullugu Iranimut pillaatitut iliuutsinik sukannersunik taamanikkut atuutilersitsivoq. Iran tassunga akiniaalluni uranip atorsinnaanngorsarneqarneqarsinnaassusianut 2015-imi isumaqatigiissutigineqartumi killilersuutit qaangerpai.
/ritzau/Reuters
