Iranimi parnaarussivik ikuallammat inuit sisamat ajunaarput

Iranip illoqarfissuani Teheranimi parnaarussivissuaq Evinimik atilik arfininngornerup unnuaani ikuallarujussuarmat inuit sisamat ajunaarput.

Taama tusarfiit tutsuiginartut allapput.

- Parnaarussat sisamat putsumik najuussuivallaarsimanertik toqqutigaat. Inuillu 61-t missaat ajoqusersimapput, taakkunanngalu sisamat inuunerminnik maanna navianartorsiorlutik, tusarfiit allapput.

Parnaarussivissuarmi ikuallattoqarnera aallaasersortoqarneralu ippassaq arfininngornerup unnukkuani aallartippoq, ikuallannerli maanna qamereersoq aammalu inuit eqqissikannereersut oqaatigineqarpoq.

Parnaarussivissuarmi ilisimaneqarluartumi Evinimi inuit parnaarusimaneqartut tassaanerupput Iranip inatsisai naapertorlugit assigiinngitsutigut pinerluuteqarsimanermikkut parnaarunneqarsimasut.

Tassanilu parnaarussivissuarmi parnaarusseriaaseq nunani killerniit isoriniarneqartarpoq, taakkumi isumaqartarmata inuit pisinnaatitaaffii qaangerujussuarlugit tassani parnaarussisoqartartoq.

Inuit pisinnaatitaaffii pillugit kattuffissuup Human Rights Watchip parnaarussiviit taama ittut qunusaaraluni naalliutitsilluni piffissamillu killiligaanngitsumik periuseqarluni parnaarusseriaaseqarnerit isornartorsiortarpai. Parnaarussallu aamma nakorsamit misissorteqquneqarneq ajorput aammalu killisiorneqarujussuarsinnaasarlutik.

Parnaarussivissuup ikuallalernera pilerpoq, illoqarfissuarmi Teheranimi Iranimilu illoqarfinni arlalinni ippassaq arfininngornermi innuttaasut naalakkersuisuminnut akerliussutsimik takutitsinerisa kingorna, oqaatigineqarporlu akerliusut suli sukakkaluttuinnartut.

Inuit pisinaatitaaffii pillugit sorsuuteqartuusut videolianik siammartereqattaarput, tamannalu akerliusunit aamma aalassassutaavoq.

Akerliuniat qaammatip ataatsip matuma siornamut sanilliullugu sukakkaluttuinartut aammattaaq oqaatigineqarpoq.