Islamisk Statimeersut Irakimi qaartartumeerimmata politiit qulingiluat toqutaasut
Irakimi qaammatini kingullerni aatsaat taama sakkortutigisumik saassussisoqarpoq.
Islamisiortut peqqarniisaarniat Islamisk Statimeersut Irakimi illoqarfimmi Kirkukimi sapaammi qaartartumeerisuunerarlutik nassuerput. Politiit biiliisa ilaat tassani qaartinneqarpoq, politiillu qulingiluat toqutaallutik. Inuillu allat marluk saassussinermi aamma aqqunartitingaatsiarput.
Nutaarsiassaqartitsivik Reuters taama allaaserisaqarpoq.
Tamannalu pivoq illoqarfeeqqami Saframi.
Peqqarniisaarniat saassussisut malersorneqarlutillu tigusarineqarnissaat, Irakip ministeriunerata Mohammed Shia al-Sudanip politiinut sakkutuunullu naalakkiutigaa aamma oqaatigineqarpoq.
AAMMA ATUARUK Islamisk Stat Mosulimi ajorsartinneqarpoq
Islamisiortut Islamisk Stat illoqarfiup Kirkukip nalaani takussaasorujussuupput.
Sakkutuut sisamat Kirkukip nakkutilliivianneersut novembarimi aamma aallaaneqarlutik toqutaapput.
Islamisk Statimeersut qaartartut atorlugit Irakimi Kirkukip nalaani politiinik saassussikkajupput.
Islamisk Statikkut Irakimi ajugaaffigineqartutut 2017-imi nalunaarutigineqaraluarpoq. Islamisk Statimiilli sinneruttut Irakimi nunap immikkoortuini assigiinngitsuni kingorna saassussisaqattaarnikuupput.
Islamisk Statimeersut Irakimi Syriamilu 6000-it 10.000-llu akornanniinnissaat ilimagineqartoq, Naalagaaffiit Peqatigiit nalunaarusiaanni, saqqummiunneqaqqammersumi tamanna takuneqarsinnaavoq.
