Isornartorsiuineq: Kommunimi qullersaqarfimmi sulisut akiliunneqarlutik feeriartarsimapput
Kommuneqarfik Sermersuumi qullersaqarfimmi sulisut feeriami akiliunneqarlutik angalasarnerat inatsisartut ombudsmandiata isornartorsiorpaa.
Kommunimi qullersaqarfimmi sulisut atorfininnermi isumaqatigiissutitigut akiliunneqarlutik inoqutaasalu, meeqqat angerlarsimaffimmi najugaqartut sulilu 18-iliisimanngitsut ilanngullugit ukiumoortumik angalatinneqarsinnaatitaasut kommunip oqaatigaa.
Tamanna sulisup atorfininnermi isumaqatigiissutaaniittoq oqaatigineqarpoq.
Inatsisartulli ombudsmandiata apeqquteqaateqareernerata kingorna taama akiliussilluni feeriartitsinissamut inatsisitigut tunngavissaqanngitsoq kommunip paasivaa.
Ombudsmandip tamanna isornartorsiungaatsiarpaa.
Akiliunneqarluni feeriarneq atorunnaarsinneqartoq
Kommuni taamaammat sulisut akiliunneqarlutik feeriarsinnaanerat ukioq manna oktobarip aallaqqaataani atorunnaarsippaa, tassa sulisut feeriami akiliunneqarlutik isumaqatigiissutit atuuttut tunngavigalugit taama angalasinnaatitaanngitsut kommunip paasivaa, taamalu tamanna atorunnaarsillugu.
KNR-ip Kommuneqarfik Sermersuup kommunaldirektøria Ole Jakobsen tamanna pillugu oqaloqatigerusukkaluarpaa, tamannali iluatsissinnaasimanagu.
Kommunaldirektørili KNR-imut allakkatigut naatsumik akissuteqarpoq:
- Ombudsmandip isornartorsiunera tiguarput, tusaatissatullumi soorunami tigullugu. Qullersaqarfimmi sulisut feeriami akiliunneqarlutik angalasarnerat taamaasilluta atorunnaarsipparput, Kommuneqarfik Sermersuumi kommunaldirektøri Ole Jakobsen oqarpoq.
