Israelimiut Gazami qaartartumeerisut
Gaza, Akullersuarmut sinerissamiittoq, nunallu annertussusaanut naleqqiullugu nunarsuarmi innuttaqarnerpaanut ilaasoq, Israelimit unnuaq qaartartumeerneqarpoq.
Israelimi illersornissaqarfik nutaarsiassaqartitsivimmut Reutersimut taama ilisimatitsivoq.
Qaartartut igeriuttakkat arlallit Gazamit Israelimut igeriunneqarnerat akiniarneqartoq Israelip oqaatigaa.
Palæstiinamiut islamisiortut Hamasimeersut, Gazap annertunersaani 2007-imili aqutsisuulerput. Islamisiortut ingasaassiniat Islamisk Jihad tamaani aamma sunniuteqartorujussuupput.
Inunnik ajoqusertoqarsimanersoq toqutaasoqarsimanersorluunniit sisamanngornermi ullaakkut nalunaarutigineqanngilaq.
Kikkut Gazamit Israelimut qaartartunik igeriuttakkanik igeriussisimanersut suli ilisimaneqanngilaq.
Sakkutuut Islamisk Jihadimeersut saassussisuusimanissaat Israelimi sakkutuut ilimagaat. Islamisk Jihadimmi sakkutuuisa Israelimiullu sakkutuuisa akornanni Vestbreddenimi illoqarfimmi Nablusimi pingasunngornermi sakkuaattoqangaatsiarpoq.
Palæstiinamiut aqqanillit sakkuaannerni toqutaapput, allallu 100-nit amerlanerusut Israelimiut Nablusimi eqqaassineranni ikilerneqarlutik.
