Issittoq naatsorsuutigisamit sukkanerusumik kiatsikkkiartortoq

Issittoq nunarsuup sinneranut naleqqiullugu marloriaammik pingasoriaammilluunniit sukkanerusumik kiatsikkiartortoq siusinnerusukkut misissuinerit takutippaat

Issittulli kiatsikkiartornera nunarsuup sinneranit 1979-imit sisamariaammik sukkanerusoq, misissuinerup nutaap takutippaa.

Norskit nutaarsiassaqartitsiviat NTB taama allappoq.

AAMMA ATUARUK Canadap issittortaa nunarsuup sinneranit pingasoriaammik kissakkiartorneruvoq

Norgemit Finlandimiillu ilisimatusartut qaammataasanit 1979-p kingorna paasissutissat misissorpaat.

Ilisimatusartut Issittoq ukiut qulikkaarlugit 0,75 gradimik kiatsittartoq paasigamikku tupaallapput.

Tamannami silap pissusaa pillugu nalunaarsukkani naatsorsuutigineqartumit pingajorarterummik anneruvoq.

- Issittup kiatsikkiartornera nunarsuup sinneranit marloriaammik sukkanerusoq atuagassiani allaqqammat, uagut kisitsisigut qaffasinnerunerat uannut tupaallannalaarpoq, ilisimatusartut ilaat Finlandip silasiorfianeersoq Antti Lipponen NTB-mut oqarpoq.

AAMMA ATUARUK 1989-imiilli marloriaammik kiannerulersoq

Nunat ilaasa kiatsikkiartornerisa sukkassusaat assigiinngitsorujussuusut misissuinerup aamma takutippaa. Inngikitsup avataani Ruslandillu avannaani qeqertani Novaja Semljami ukiut qulikkaarlugit 1,25 gradenik kiatsissimavoq.

Misissuineq Naturep atuagassiaatigut Communications Earth & Environmentikkut sisamanngormat saqqummiunneqarpoq.