Isumaqatigiissut nutaaq: Nunarput nammineerluni aalisarneq pillugu isumaqatiginninniartalissaaq
Ruslandip Ukrainemik saassussinera, illersornissaq pillugu isumaqatigiissut nutaaq, nunanilu tamalaani aalisarneq pillugu suliniaqatigiiffinni nammineq isumaqatigiinniarnerit.
Tassa tamakkuupput Nunanut allanut tunngasunut, sillimaniarnermut illersornissamullu politikki pillugit attaveqaatitut ataatsimiititaliap Thorshavnimi sisamanngornermi ataatsimiinneranni eqqartugaasa ilaat.
Ataatsimiititaliaq Kalaallit Nunaanni Savalimmiunilu naalakkersuisunik Danmarkimilu ministerinik ilaasortaqarpoq, nunat taakkua pingasut akunnerminni paasissutissanik pingaarutilinnik avitseqatigiittarnissaat pillugu ataatsimiititaliaq siorna pilersinneqarpoq.
Ukrainep sorsunnermi tapersersorneqarnissaa, Putinillu EU-mit pillaatitut iliuuseqarfigineqarnerata attanneqarnissaa ataatsimiinnermi isumaqatigiissutigineqarpoq.
Nunarput peqataassasoq
Issittup illersorneqarneranut tunngatillugu isumaqatigiinniarnerni Kalaallit Nunaata Savalimmiullu ilaatinneqartarnissaat aalajangerneqarpoq, Folketingimmi illersornissaq pillugu isumaqatigiissummik ukiorpaalunnut atuuttussaq pillugu ukiaru isumaqatigiinniutigilerpagu nunarput Savalimmiullu peqataatinneqartarnissaat kissaataammat.
- Tulliani danskit akunnerminni illersornissamut isumaqatigiissuteqarniarnerminni Folketingemi sulineranni kingumoortumik ilisimatinneqarnata siumoortumik ilisimatinneqarlutalu ilaanissarput uani eqqartorneqarlunilu naqissuserneqaqqippoq, Múte B. Egede KNR-mut oqarpoq.
Tamanna qanorpiaq ingerlanneqassanersoq suli ilisimaneqanngilaq.
Nunat killiit illersoqatigiiffiata NATO-p Københavnimi juunip naalernerani ataatsimiittussaavoq, Kalaallit Nunaat Savalimmiullu peqataasinnaanissaat aamma misissorneqassaaq.
Aalisarnermi nunatut nammineq isumaqatigiissusiorsinnaaneq
Savalimmiullu Kalaallit Nunaallu aalisarneq pillugu suliniaqatigiiffinni nammineq isumaqatigiissusiorsinnaanersut aamma misissorneqassaaq.
Kalaallit Nunaammi Savalimmiullu ataatsimoorullugu kunngeqarfik Danmark sinnerlugu maanna isumaqatigiinniartarput.
Kalaallit Nunaalli Savalimmiullu aalisarneq pillugu assigiinnik ilaatigut soqutigisaqarneq ajorput. Taamaammat nunat suliniaqatigiiffinni nammineq ilaasortaasinnaanersut maanna misissorneqassaaq.
- Ungasiffigisarparput ilaatigut imartani avitseqatigiiffigisatsinni pisassanik soqutigisagut assigiinngitsuusarmata. Soorunami soqutigisagut uagut nunatsinni nunattalu aamma aningaasarsiornissaanut sammiveqarlutik aamma illua-tungaani savalimmiormiut taamaassinnaasartut, Múte B. Egede oqarpoq.
Issittumi sillimaniarneq pillugu Naalagaaffeqatigiit USA-mik suleqateqalernissaat maanna sulissutigineqartoq ataatsimiititaliap ilisimatitsissutigaa. Kalaallit Nunaata, Savalimmiut Danmarkillu ataatsimoorullugu isumaqatigiissusiorneratigut tamanna pissaaq.
