Italiami pisiniarfeqarfissuit ilaanni savilersortoqarnerani ataaseq toqutaasoq arlallillu ikilerneqartut

Angut 46-nik ukiulik Milanomi pisiniarfeqarfissuit ilaanni savilersortutut pasineqarluni tigusarineqartoq tarnikkut napparsimasuunerarneqarpoq.

Allattoq Ritzau

oktobarip 28-at 2022 12:07

Nutserisoq Mads Lynge

Angut Italiap avannarpasissuani illoqarfimmi Milanomi pisiniarfeqarfissuit ilaanni sisamanngornermi savilersormat, inuit ikinnerpaamik tallimat kapineqarput. Ataaseq toqutaavoq arlallillu ikilerneqarlutik.

Italiami nutaarsiassaqartitsiviit arlallit taama allattut, tuluit tv-qarfia BBC allappoq.

Inuit pingasut ikilingaatsiarneqarsimasut napparsimaviliaanneqartut, nutaarsiassaqartitsiviit marluk Ansa aamma Adnkronos allapput.

Angutip savilersortup inuit ikinnerpaamik tallimat kapivai, taamaalereersorlu angut taanna inunnit allanit pisiniarfeqarfimmiittunit unitsinneqarluni.

Spaniamiu isikkamik arsaattartoq, Pablo Marí, ikilerneqartunut ilaavoq. Taanna arsaattartoqatigiinni AC Monzami arsaattartuuvoq.

Savilersortoq 46-nik ukiulik politiinit maanna tigummineqarpoq.

Peqqarniisaarniartoqarsimanngitsoq misissuinerit siulliit takutikkaat, Milanomi politiit nalunaarput.

Savilersortoq tarnikkut napparsimasuunerarneqartoq, Italiami tv-qarfiup Raip oqaatigaa.

Nutaarsiassami kukkunermik nassaarsimaguit uunga allaffigineqarsinnaavugut.