Jens Thorin nersugaasoq: Meeqqat uummateqarfiginissaat pingaarnerpaavoq

Uummannami timersoqatigiiffimmi UB-68-imi meeqqat futsalertartut isikkamillu arsaattartut sungiusaasuat, Jens Thorin, sungiusaallammattut 20.000 koruuninik aningaasartalimmik pokalertalimmillu arfininngormat Maligassiuisut Showertoqarnerani nersugaavoq.

Taannalu nersugaanermini oqalugiarami killitsisimaaqaaq.

- Nersornaaserneqarnera uannut isumalerujussuuvoq, aamma imminut pingaartittorsuunnginnama. Aatsaalli takulerpara qanoq isumaqartigisoq, Jens Thorin KNR-imut oqarpoq.

Taanna Uummannami politiiuvoq. Tamatuma saniatigut nipilersornermik timersornermillu sunngiffimmi aamma sammisaqartitsisarpoq.

AAMMA ATUARUK Maligassiuisut Showimi nersornaasiisoqarpoq - nersornaaserneqartullu aaku

- Kingumut aamma eqqarsaatigalugu meerarpassuit inersimalersullu nuannisaqatigisarneri aatsaat soorlu takulerikka nuannersorujussuarmik.

Taamatummi nersornaaserneqarnerit qanoq igaajuk?

- Soorunami uummatinnut kusanartumik ilivara. Taamatut isiginiarneqarsimanera ajunngitsorujussuarmik nuannersumillu tiguara.

Nersornaasigaanissi ilimasuutigisimanngikkaa

Jens Thorin nersornaasigaanissi ilimasuutigisimanagu nersornaasigassatullu innersuunneqarsimalluni paasigamiuk pissangaammersimalluni, KNR-imut ilaatigut aamma oqarpoq.

Uummanami timersoqatigiiffimmi UB-68-imi sungiusartakkanilu 20-t missaanniittut nuannisartaqalutik, taanna oqarpoq.

- Sapaatit akunnerannut marloriarluta sungiusartarpugut, sungiusariitsiareeraangattalu tullissaanut erinisulereertarpugut. Sungiusassatillutalu qilanaalereersimallutik ullaakkut itersimanerartarput.

Nalliuttuni aallaqqasimagaangami takunngilaaraangamillu imminnut maqaasilertarluk, Jens Thorin oqarpoq.

Pinaveersaartitsineq, oqaaqqissaarineq maligassiuinerlu

Taamatut aallutaqarluassagaanni, qanoq tunniusimalluartigisariaqarpa?

- Tassa meeqqat uummateqarfiginissaat pingaarnerpaavoq. Taavalu arsarnermik soqutigisaqarnissaq, minnerunngitsumillu angajoqqaat tapersersuinissaat. Taamaakkaangamik aatsaat iluatsissinnaasarpoq, Jens Thorin KNR-imut oqarpoq.

Taassuma piffissarujussuaq piareersarnermut atortarpaa. Soorlu pinaveeraartitsineq, oqaaqqissaarineq maligassiuinerlu meeqqanut tunniunniarsarisarini, taanna oqarpoq.

Sungiusaallammattummi qanorpiaq oqariartuuteqarusuppit?

- Maligassiuisut Showip aallartinnerani oqaatigineqartut isumannut eqquuteqaat. Tassa inersimasut angajoqqaallu meeqqat pinnguaqatigisassagaat utaqqisariaqanngitsullu, tassa massakkumiit aallartissasut, Jens Thorin oqarpoq.

Sungiusaallammallu allanik pilersaalereerpoq. Siunissamimi unammiarnissat eqqartuleruttorpaat.