Timersornermik ataqatigiissaarisoq: Arnat timersornermi 2021-mi siuttunngortut
Nunatsinnit timersortartut arlalinnik ukioq manna angusaqarluarput.
Isikkamik arsaattartoq inuusuttoq danskit nunanut allanut unammisartuisa inuusuttortaani peqataasarpoq, sisoraaserluni ooqattaasartoq OL-imut anngunnissaminut periarfissaqarluarpoq, assammillu arsarlutik nunanut allanut unammisartut Amerika Avannarlermiut Caribiamiullu pissartanngorniunneranni unammilluavissorput.
AAMMA ATUARUK Sisoraaserluni ooqattaasarneq: Ukaleq OL-mut periarfissagissaarpoq
Timersornermilu angusat taakkua suna assigiissutigaat? Tamarmik arnanit anguneqarput.
Tamannalu nunatsinni timersornerup ukiuni kingullerni qanoq ineriartorsimaneranut takutitsilluartoq, KNR-ip timersornermik ataqatigiissaarisua, Noah Mølgaard, naliliivoq.
- Arnat nunarput sinnerlugu ukiuni makkunani unammisartuni angutinut sanilliullugit saqqummilaarnerulernikuupput. Timersuutini assigiinngitsuni taama inissisimalernikuupput. Sisorarnermi, arsaannermi kiisalu aamma assammik arsarnermi Danmarkimi arnanut ligani unammisartoqalernikuulluta, timersornermik ataqatigiissaarisoq oqarpoq.
Nunani tamalaani takutitsilluartut arlaliusut
Noah Mølgaardip timersortartut sisamat ukioq manna anguasarissaartutut assersuutigai.
Siullertut Ukaleq Slettemarkip sisoraaserluni ooqattaasartutut piginnaaneqarluarluni takutippaa, OL-imullu anngunnissaminut periarfissaqarluarluni.
Asii Kleist Berthelsen isikkamik arsaalluni klubbinut pissartanngorniunnerit annersaanni Champions Leaguemi danskillu nunanut allanut unammisartuisa u-19-iini siullermeerluni unammeqataavoq.
AAMMA ATUARUK Maligassiuisut show: Asii Kleist Berthelsen nersorniaqqippaat
Taakkua saniatigut Amerika Avannarlermiut Caribiamiullu USA-mi aasaq manna pissartanngorniunneranni peqataasoq Nykøbing Falster Håndboldimilu assammik arsartartoq Lykke Frank Hansen, sangusaartartorlu OL-imut anngunniarsarisoq Nuunu Chemnitz Berthelsen eqqaavai.
Eliten har alderen med sig
Taakkualu aqqi tusartaqattaassagunarigut, timersornermik ataqatigiissaarisoq isumaqarpoq. Arnammi timersortartut inuusuttut timersornermi nunatsinnik pingaarnertut sinniisuusussaarpasittut, Noah Mølgaard oqarpoq.
- Ukiut kingulliit qiviarutsigit, angutini Danmarkimi pikkorinnernut akuliussinnaasunik takkuttoqartarnera akuttuvoq. Taamaattumik ukunani timersuutini assigiinngitsuni arnat ukiuni tulliuttuni siuttutut inissisimanissaat ilimanarpoq, Noah Mølgaard oqarpoq.
Angutinili futsallertartuni Danmarkimi Sverigemilu angusarissaartoqartoq ilanngullugu oqaatigaa.
AAMMA ATUARUK Misissuineq: Suut arnat timersornermi aporfigalugillu iluaqutigaat?
Timersornermi arnat ikinnerussuteqartut
Nunatsinnili timersornermi arnat ikinnerussuteqartut Idrættens analyse institutip 2015-mi 2020-milu misissuinerani erserpoq.
Taamaammat arnat inuusuttut timersullaqqittupilussuit sooq taama amerlatiginersut erseqqivinngilaq.
- Tamanna nalaattorneriinnaasinnaavoq, ukuami inuit pikkorinnerni unammisartuutigut immikkuullarissupilussuupput, Noah Mølgaard Ukaleq Slettemarkimut, Asii Kleist Berthelsenimut, Lykke Frank Hansenimut Nuunu Chemnitz Berthelsenimullu innersuussilluni oqarpoq.
