Kajumissutsiminnik saliiniartut amerlavallaartut: Umiatsiaaqqat naammanngitsut
Nammineq kajumissutsiminnik suliaqartut 16-it eqqakkanut puussalerlutik plastikkinillu aaqqatilerlutik Nuummiit arfininngormat aallarput.
Taakku kangerlunni puussianik plastikkinik, sølvpapirinik allanillu eqqakkanik sapinngisartik tamaat katersinissaq anguniagaraat.
Eqqagassanik katersineq Kommuneqarfik Sermersuup Nuuk Water Taxillu suleqatigiinneratigut ingerlanneqarpoq. Siullermik ukiut marluk matuma siorna taama saliisoqarpoq.
- Katersinissatsinnut aalajangersimanitsinnut peqqutit arlaqarput. Sulisugut amerlanerpaat sulinerat imaani pisarpoq. Eqqakkat puttaannartut naammattoortuartarpaat, tamannalu iliuseqarfigerusuppaat, Nuuk Water Taximi ingerlatsinermi ataqatigiissaarisoq Katja Pedersen oqarpoq.
- Aamma illoqarfitsinni maangaannaq eqqakkat takornarianiit maluginiarneqartarput, ingammik apuk aaqqammeraangat. Aamma pinngortitamik paarsilluarnissaq pissusissamisuuginnartut isigaarput.
55-it peqataaniarlutik nalunaartut
Ukioq manna nammineq kajumissutsiminnik peqataarusuttut 16-it eqqakkanik katersinissamut nalunaarsinnaapput, 55-illi nalunaarput.
Kisianni ajornarsiuteqalerpoq. Ukiummi imaalinerani takornariaqarluarnerani atorneqarsinnaasunik umiatsiaqanngilaq. Taamaammat nammineq kajumissutsiminnik saliiniarlutik nalunaartut 16-it siulliit kisimik inissaqartinneqarput.
Assi: Kommuneqarfik Sermersooq
Nuuk Water Taxi takornariaqarpallaarunnaarpat assingusumik ukiamut aaqqissuussiniarluni pilersaaruteqarpoq.
- Suliniutitta tigulluarneqarnera aammalu pinngortitamik paarsilluartoqarusunnera uagutsinnut tuppallernaqaaq. Tullissaani aaqqissuusseqqilerutta neriuppugut angallatit amerlanerusut atorsinnaassallutigit, taamaasilluta avataangiisitsinnut ajunngitsuliorusuttut tamarmik peqataasinnaaniassammata, Katja Pedersen oqarpoq.
Aalisarnermit eqqagassat 50-imit 100 kiilumut
Eqqagassat oqimaalutaqqissaarneqanngillat. Kommunilli avatangiisinut immikkoortortaqarfiani aqutsisup, Jakob Kofodip qassutit, ningittakkat aalisakkanullu puut 50 kiilumit 100 kiilumut oqimaassuseqartut umiatsiaaqqat tikinneranni biilinut issoraanneqarput.
Aalisarnermi atortunik eqqakkat qimaannakkat ajornartorsiutaanerpaasut taanna isumaqarpoq. Puisimmi qassutinut atorunnaakkanut nermuttoorsinnaapput.
- Igiinnarneqanngikkaangamik imaaniitsiinnarneqartarneri ajornartorsiutaavoq. Aalisartut soorunami aamma puiuisinnaapput, aamma umiatsiamit katattoorneqarsinnaapput, kommunimi avatangiisinut immikkoortortaqarfimmi aqutsisoq qassutit, ningittakkat aalisakkanut karsit kangerlummiittut pillugit oqarpoq.
Assi: Kommuneqarfik Sermersooq
- Kisianni inuit eqqagassalerisarnerannut atatillugu allanngoriartortoqarpoq. Inuit inuussutissarsiornermit eqqagassaqaraangamik eqqakkanik tigooraavimmut saaffiginninnissaq nalunngilaat.
Ningikkattakanik, aalisakkanut karsinik aalisarnermiillu eqqagassanik allanik tunniussineq tonsimut 184 koruuneqarpoq. Eqqagassat taakku qarsortartaqanngitsut puttasortaqanngitsullu tunniunneqassapput.
- Nnuummi innuttaasut amerlanerpaartaasa pinngortitaq eqqarsaatigalugu attaqqisaraat ilisimavarput. Tamaattorli innuttaasunik illoqarfimmik pinngortitamillu eqqaavittut atuisunik ajoraluartumik ilaqarpugut, tamatumalu kingunerisaanik illoqarfiup iluani Nuullu eqqaani kangerlunni eqqagassat annertuut katersuutilertarput.
