Innuttaasunut Mimi Karlsenip kaammattuutaa: Uanga sisamassaa akiuussusertissaanga

Covid-19-imut sisamassaanik akiuussuserteqqinnissaq piffissanngorpoq.

50-it sinnerlugit ukioqalersimaguit imaluunniit coronap ilinnut navianaateqarnera pillugu peqqinnissaqarfimmit nalunaarfigineqarsimaguit akiuussuserteqqissinnaavutit.

Peqqinnissamut naalakkersuisoqarfik tusagassiuutinut taama nalunaarpoq.

Taakku aamma allapput, virusit kingulliit coronamik napparsimalersitsisarneri siornamut naleqqiullugit atuipiluutaaneri annikinnerugaluartut taamaattoq corona ataatsimut isigalugu suli mianersuuttariaqartoq, ingammik utoqqaat mianersorfigineqarnissaat pingaaruteqartoq allallutik.

Meeqqanut, Inuusuttunut Ilaqutariinnullu Naalakkersuisoq, Mimi Karlsen coronamut akiuussuserteqqinnissaminut pilersaarpoq.

- Naak peqqikkaluarlunga sisamassaanik kapitissamaarpunga. Kingullermik akiuussusersorneqarama malugaara. Iluarpallaanngilaq, kisianni sapaatit akunnerpassuarnik napparsimanissaq ajornerpaavoq, tamannalu uattut ukioqartunut suli periaannaalluni, Mimi Karlsen oqarpoq, taanna maannamut pingasoriarluni akiuussuserteerpoq aamma coronamik tunillatsereersimalluni.

Ukiap ingerlanerani corona nunatsinni tuniluuteqqilersinnaasoq, nunatta nakorsaanerata aasaq manna juulimili ilimasaarutigereerpaa.

AAMMA ATUARUK Nakorsaanermit kaammattuut: Tuniluuttoqalissaaq - akiuussusertigit - aammalu

Coronamik tunillanneqarnermi inuit ilaasa napparsimarulullutik tamassuma toqqutiginnginnissaat pillugu sisamassaanik akiuussusertineqarnissamik neqeroortoqqartoq, nunatta nakorsaanerata, Henrik L. Hansep KNR-imut oqaatigaa.

- Ukioqqortorunerit perululersinnaanerupput. Taamaattumik utoqqaanerusut akiuussusertikkunik iluaqutiginerussavaat, nakorsaaneq Henrik L. Hansen oqarpoq.