Kalaaleq arnaq 27-nik ukiulik Københavnimi toqutsisimasutut parnaarussivimmi tigummigallagassanngortinneqartoq

Arnaq 27-nik ukiulik angummik 61-inik ukiulimmik toqutsisimasutut pasineqarluni Roskildep Eqqartuussiviani inatsit tunngaviusoq naapertorlugu killisiuisoqarneratigut sapaatini akunnerni sisamani parnaarussivimmi tigummigallagassanngortinneqarpoq.

Angut Solrød Strandimi Birkegaardsallemi toqungasoq sapaammi nassaarineqarpoq. Midt- og Vestsjællandimi Politiit taama paasissutissiipput.

Angutip toqusup ikinngutaata najukkamut ornigulluni arlaannik ajortoqarneranik paasisaqarnerata kingunerisaanik politiit sapaammi ualikkut nalunaaqutaq 16.39 ornigupput. Midt- og Vestsjællands Politiini pisortap tullersortaa, Bjørke Kierkegaard oqarpoq.

- Inuk toqusimasorineqartoq pillugu sianerfigineqarpugut, sumiiffimmut ornigukkatta angut toqoreersimavoq, Bjørke Kierkegaard oqarpoq.

Politiit najukkamut apuukkamik angut 61-inik ukiulik nassaaraat, arnarlu 27-nik ukiulik aamma naapillugu. Taanna pisumut atatillugu tigusarineqarpoq.

AAMMA ATUARUK Kalaaleq arnaq angummik 61-inik ukiulimmik Københavnimi toqutsisimasutut pasineqartoq

Politiit ornigumminnerminni angut nakuuserfigineqarsimagunartoq paasivaat, Bjørke Kierkegaard paasissutissiivoq.

Angutip qanga qanorlu toqusimanera pillugu aalajangersaanissamut toqungasumik misissuisoqarnisaa amigaataavoq.

Pinerluuteqarfimmili toqusumik misissuinermi angut nakuusertoqarnerata kingunerisaanik toqusimasoq Midt- og Vestsjællandimi politiit tusagassiuutinut ataasinngornermi ualikkut paasissutissiipput.

- Pinerluttoqarsimanermik misissuisartut pinerluuteqarfiusumi suli misissuinerat pissutigalugu annerusumik paasissutissiisinnaanngilagut, Bjørke Kierkegaard oqarpoq.

Arnaq 27-nik ukiulik kalaaliuvoq. Taannalu angullu 61-inik ukiulik imminnut attuumassuteqarput, qanorpiarli attuumassuteqarnersut politiit suli paasissutissiissutigisinnaanngilaat.

Toqutsinermullu pissutaasoq politiinit suli aamma paasissutissiissutigineqarsinnaanngilaq.

Arnaq toqutsinermi pinngitsuunerarpoq, taassumali parnaarussivimmi tigummigallaasoqarnissaanut aalajangiineq Danmarkimi eqqartuussisuuneqarfimmut ingerlateqqissimaneraa paasissutissiissutigineqanngilaq.