Kalaaleq pequtinik eqqumiitsuliortoq nersornaaserneqartoq
- Piviusumik nersornaatisinissara takorloorsinnaanngisaannaraluarpara. Finn Juhl Prisen danskit ilusilersuisarneranni nersornaasiinermi anginerpaat ilaagaat, taamaammat suliannik nersornaasiineruvoq angisooq.
Kalaaleq illuliassanik titartaasartoq, Aviaaja Ezekiassen 100.000 koruuninik aningaasartalimmik Finn Juhl Prisimik ukioq manna nersornaaserneqartunut ilaasoq tamanut saqqummiunneqareersoq KNR-imut oqarpoq.
Aningaasaateqarfiup Aviaaja Ezekiassenip ukioq manna nersornaaserneqarnera pequtinik eqqumiitsulianik nutaalianik sananissamut piginnaasaanik, taakkulu kalaallit eqqumiitsuliornermi ileqquannik atuiffiunerannik tunngavilersorpaa.
Ileqqutoqqat nutaaliornermi atorneqartut
Aviaaja Ezekiassenimmi kalaallit kulturiannit isumassarsiorluni ilusilersuinera aamma malunnarpoq.
Taannami sapangalianik allapalaakkanik aammali oqaluttualianut oqaluttuanullu tunngassuteqarpoq.
Aviaaja Ezekiassenip issiavik ornavaffik ”Paddle Chair” ilusilersorpaa, taannalu kalaallit qaannamut aaguuannit isumassarsiorfigaa.
Assi: Aviaaja Ezekiassen.
Issiaviup niului orpimmik manngertumik taartumik ilusiligaapput orpillu qaamasumik kaavallassimalluni. Taamaalilluni naggueqatigiit inuit qaannami aaguutaannut qissiamik uumasullu saarnganik kaajallassimasumut innersuussutaasoq takuneqarsinnaalluarpoq,
Aviaaja Ezekiassenip nerrivimmi qulleq kalaallit kulturianit aamma isumassarsiorfigaa, taanna ”Moon Traveller”-imik ateqarpoq.
Qullip aqqa angakkup qaammammut angalasarneranut innersuussutaavoq. Qulliup ilusaa angakkup angakkussartarnermini qilaataanit isumassarsiorfiuvoq.
Assi: Aviaaja Ezekiassen.
Kulturip nutaamik nassuiaatigineqarnera isumanik pigilitiinnakkanik atorunnaarsitsissasoq
Aviaaja Ezekiassenip nunatsinni kulturikkut immikkut issuserput, ilusilersueriaasitoqarput soorlu ukkusissanik tupilaliortarnerit sapanganillu kalaallisuunut nuilaliortarnerit attatiinnarnissaat pingaaruteqartoq erseqqissaatigaa.
Siumulli isigaluta nunatsinni inuiaqatigiit nutaaliaasut takutillugit kulturimik ineriartortitsisariaqartugut aamma isumaqarpoq:
- Kulturi eqqumiitsuliortarnerlu piffissap ingerlanerani allanngorartarpoq. Nunarsuarmiunut akuuleriartuinnarnitsinni nunarsuarmut isiginnittariaaserput aammali nunarsuarmit qanoq isigineqarput aamma allanngortarpoq, Aviaaja Ezekiassen oqarpoq.
Taassuma ilusilersukkani isummanut pigiliutiinnakkanut Danmarkimi kalaaliunermi naapittakkaminut allanngueqataasoq taassuma misigisimavaa:
- Danmarkimi ukiut qulit sinnilaarlugit najugaqarpunga. Isummat pigiliutiinnakkat tikeqqaarninniit annikinnerusumik maanna nalaattarpakka. Tamanna ilusilersuisarninni nunatsinnik nutaaliaanerusumik takutitsinissamut nutaamik nassuiaatiginninnissannut piumassuseqalersitsivoq.
Saqqummersitsineq nutaaq
Aviaaja Ezekiassenip suliami kingulliit saqqummersinnissaat manna suliaraa, taakku Kalaallit Illuanni Københavnimi juunip qiteqqunnerani saqqummersinneqassapput.
- Saqqummersitsineq suliniumut ”Seven Subjects”-imut ilaavoq. Taanna ilusilersukkanik assigiinngitsunik arfineq-marlunnik saqqummersitsiviussaaq, taakkunanilu qanoq ililluta kulturitsinnik tulluusimaarutiginnilluta siunissami takutitsisinnaanissatsinnik nassuiaateqartoqassaaq.
Saqqummersitsineq ingerlaartussaavoq, taamaammat Nuummi, Aalborgimi Odensemilu aamma takuneqarsinnaassallutik.
Aviaaja Ezekiassenip pequliaanik soqutiginnikkaanni tassunga allattoqarsinnaavoq, taassumami ilusilersugai suli tunisassiarineqalinngillat.
Taassumali Finn Juhl Prisenimik nersornaaserneqarnini pequtinut maluginninnerulersitsissasoq neriuutigaa.
