Kalaallisut Danmarkimi radiokkut aallakaatitsisoqarsinnaalissasoq
Kalaallisut oqallorissut radiokkullu aallakaatitsisalerusuttut takorluukkaminnik timitaliisinissaminnut periarfissaqalerput.
Kalaallimmi Danmarkimi najugallit atassuteqaqatigiiffissaminnik tusarnaagassiortalernissamik danskit illussaarsuarnut kultureqarnermullu aqutsisoqarfiannut qinnuteqarsinnaalissapput. Kalaallisummi Danmarkimi radiokkut nalinginnaasukkut nittartakkakkulluunniit radiokkut aallakaatitsisoqarsinnaanngussaaq.
Danmarkimi kalaallit ataasiakkaat kalaallilluunniit, soorlu tusagassiorfii peqatigiiffiiluunniit, aningaasalliissutinit tapiiffigineqarnissamik qinnuteqarsinnaapput.
Kalaallisut Danmarkimi radiokkut aallakaatitsisalernissaq
Kalaallisut Danmarkimi radiokkut aallakaatitsinermik 2022-miit 2025 ilanngullugu suliniutinut agguarlugit atugassatut illikartinneqartut 7 millionit koruuniupput.
500.000 koruunit 2022-mi tunniunneqassapput, 2023-mi 2,5 millionit koruunit, 2024-mi 2 millionit koruunit 2025-milu aamma 2 millionit koruunit.
Tusarfik: Danskit kultureqarnermut ministereqarfiat
Qinnuteqartut akornanni tusarnaagassiortussarsiortoqassaaq, tamatumanilu piginnaasaat, oqallorissusaat misilittagaallu tunngavigalugit toqqarneqassallutik, taakkulu aallakaatitsisarnissaminnut missingersuusiorsimanissaat piumasaqaataassaaq.
Danskit partiivi Folketingimi amerlanerussuteqartut aningaasanut 2022-mut inatsississaminnik akuersisuusut 24 millionit koruuninik ukiuni sisamani agguagassanik suliniutinut nunatta Danmarkillu atassuteqarluarnerulernissaannut iluaqutaasussanik illikartitsisoqarnissaanik aalajangiisuupput.
Tassa Atlantikup Avannaamiunut aningaasaliissutineersunit 7 millionit koruunit 2025-p tungaanut agguagassanik kalaallisut Danmarkimi radiokkut aallakaatitsinermik suliniutinut atugassatut illikartinneqarput.
Qinnuteqarsinnaaneq oktobarip 15-ianut killeqarpoq, aallakaatitsisartussatullu toqqarneqartoq qinnuteqarnerminiit qaammat qaangiuppat ilisimatinneqassasoq, danskit illussaarsuarnut kultureqarnermullu aqutsisoqarfiat ilisimatitsivoq.
