Kalaallit Airportsip taamaatitsineq uggoraa: Naalakkersuisut apeqqutaalerput
- Kalaallit Airportsimut minnerunngitsumillu nunatta kujataanut nunatsinnullu soorunami uggornarluinnarpoq.
Kalaallit Airportsip suliniutinut pisortaa, Aviaaja Knudsen KNR-imut oqarpoq.
- Suliummik matuminnga siumut ingerlaarusunnerugaluarpugut. Erseqqissaasoqarnissaa neriuutigaarput, taamaalilluta aallartissinnaassalluta.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Nunattami kujataani innuttaasut Qaqortumi mittarfiup qaqugu sanaartulerneqarsinnaanissaanut sivikinnerpaamik ukiumi ataatsimi utaqqisussanngorput.
Mittarfiummi sanaartornissaa qularnarsivoq. Ingerlatseqatigiiffiit tallimat suliariumannittussarsiuussisoqarnerani neqerooruteqarpoq, taakkuli neqeroorutaat tamarmik Kalaallit Airportsip missingersuutaanit annerungaatsiarput.
Kalaallit Airports Naalakkersuisullu isumaliutiginnilluartariaqarput
Qaqortumimi mittarfeqalernissaanut allannguisoqartariaqartoqarpoq. Aningaasaniminni amerlanerusunik nassaartoqartariaqanngikkuni mittarfissaq 1500 meterinik takissuteqartoq allanngortinneqartariaqarpoq.
Kalaallit Airports Naalakkersuisullu suliariumannittussarsiuussinissap tullissaanut maanna isumaliutiginnittariaqarput.
Aviaaja Knudsenip oqarnera naapertorlugu aappaagu suliariumannittussarsiuussisoqassappat Naalakkersuisut allannguisuusussaapput.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
- Suliariumannittussarsiuussereerpugut, suliariumannittulli akigititaat missingersuutinit akisunerungaatsiarput. Taamaammat piginnittugullu siumut ingerlaqqinnissatsinnut isumaliutiginnittariaqarpugut, suliniutinut pisortaq oqarpoq, neqeroorutilli ingerlatseqatigiiffiullu missingersuutai qanoq nikingatigineri itisilerusunnagit.
- Arlaatigut allanngortoqassappat Namminersorlutik Oqartussat Naalakkersuisullu aalajangeeqataasariaqarput soorunami, Aviaja Karlshøj Knudsen oqarpoq.
Coronap ilungersunartorsiortitsinera akinik qaffaasimasinnaasoq
Taassuma Qaqortumi piffissaliussap ingerlanerani mittarfiliortoqarnissaa tpqqaannartumik qularnaveeqqusernianngilaa. Naalakkersuisuniimmi ingerlanneqarnissaa tassunga apeqqutaavoq. Aviaaja Knudsenilli mittarfissap pilersaarutigineqartuartutilli 2024-mi piareersimanissaa suli neriuutigaa.
Qaqortumi mittarfittaartoqarnissaa qulakkeersinnaavisiuk?
- Nunatta kujataani mittarfiliortoqarnissaa suliassaraarput, taamaammat suliap nutaamik piaartumik suliariumannittussarsiuussivigineqarnissaanut ilungersortumik suliaqartussanngorpugut, suliniutinut pisortaq oqarpoq.
Suliariumannittussarsiuussisoqarnerani akit qaffasinnerannut tunngaviit Kalaallit Airportsip suli nalornissutigaa. Suliniutinulli pisortap coronap ilungersunartorsiortitsinera pissutaaqataasinnaasoraa.
AAMMA ATUARUK Ingerlatseqatigiiffiit tallimat Qaqortumi Mittarfiliortuuniartut
Suliariumannittussarsiuussinermi coronap ilungersunartorsiortitsinerata nalaani ingerlanneqarpoq, sanaartugassanillu suliakkinneqartartut Kalaallit Airportsip naatsorsuutigisai sinnerlugit piumasaqarsimasinnaasut, suliniutinut pisortap erseqqissaatigaa.
- Mittarfiliortiternermi suliniutit naammassiuminaatsorujussuupput, siunnersortittalu tungaaniit missingersuutit ilungersunartorujussuupput. Kisianni suliariumannittussarsiuussisoqaraangat suliakkinneqartartunillu neqerooruteqartoqaraangat taakku imminnut ataqatigiittuaannanngillat, tamannalu Qaqortumi sanaartortoqarnissaanut nalaapparput, suliniutinut pisortaq oqarpoq.
