Kalaallit assammik arsartartut USA-mut finalilersut
Kalaallit Nunaat gruppimi unamminerit kingullersaanni 32-26-mik ajugaavoq.
Kalaallit aqagu sisamanngornermi unnukkut finalimut taamaasillutik anngupput, USA tassani unammineqassalluni. Unamminermi ajugaasoq nunarsuarmi aappaagu pissartanngorniunnissamut anngutissaaq.
Piukkunnaateqarluartoq Archibald Lennert isertitsinersaalluni arfineq pingasoriarluni isertitseriarnermini arfineq pingasoraarpoq, Minik Dahl Høegh arfineq marloraartoq.
Naak USA gruppini unammeqattaarnerni 36-28-mik ajugaagaluartoq angusarissaarsinnaanissartik Minik Dahl Høeghip neriuutigaa.
Anguniagaq siulleq angoreerpaat
- Nuannersuaarpoq. Finalimut ippassaq anngukkatta eqqissiallaqaagut, anguniagarput siulleq angugatsigu. Tassa finalernissaq uagutsinnut pingaartorujussuuvoq, Minik Dahl Høegh oqarpoq.
AAMMA ATUARUK Assammik arsarneq: Kalaallit Mexicomut ajugaagamik finalemut anngupput
Qanoq ingerlassanganersut aperaarput:
- Tassa taanna nalunartua. USA maannakkut siuariarujussuarsimagami, aamma malugisatsitut arsartartuisa affaat sinnerlugit Europami klubbininngaanneersuupput, tassa Europami ligani unammeqataasarput, Minik Dahl Høegh taama oqarpoq.
Miki A. Heilmann Mexicomut unamminermi aamma arsarluarpoq, tallimanik taanna isertitsilluni.
Kalaallit Nunaat USA-mut Mexicomi unammiuaarnermi unammisareerppoq. Tassa sapaatiummat unammipput, USA-lu 36-28-mik tassani ajugaalluni.
Kalaallit Nunaat finalimi tassani tassa akiniaasariaqassaaq nunarsuarmi pissartanngorniunnernut anngunniaruni. Unammineq KNR TV-kkut aqagu sisamanngornermi unnukkut nalunaaqutaq qulingiluanut tanneq aqqanermut isiginnaarneqarsinnaassaaq.
