Kalaallit Cubalu pissanganaqisumik unammisut: Cuba naammagittaalliuteqarpoq
Assammik arsarluni VM-mut anngunniunnermi finalemut anngunnissamut kalaallit suli periarfissaqarput – nalorninartulli suli arlaqarput.
Unammineq uani isiginnaaruk
Kalaallit angutit assammik arsartartut 27-27-mik Cubamut naligiiginnarpout, tamannalu naammaqqarluinnarpoq anngunniunnermi finalemut anngunnissamut kalaallit periarfissaqaannarnissaannut.
- Taamaattoq Cuba naammagittaalliuteqarpoq tamannalu pillugu aalajangerneq marlunngornermi nalunaarutigineqarumaarpoq, Amerikap avannaani Caribiamilu assammik arsartartut kattuffianni NACHC-mi unammersuarnermut ataatsimiitititaliap siulittaasua Kurt Lauritsen nalunaarpoq.
Angusat:
26. juni
Kalaallit Nunaat - USA 28-36 (14-19)
Cuba - Mexico 25-33 (16-13)
27. juni
Kalaallit Nunaat - Cuba 27-27 (12-14)
Mexico - USA 20-30 (11-17)
Ullumi unamminissat:
Nal. 19.00 USA - Cuba
Nal. 21.00 Mexico - Grønland
Inissinnerat:
1. USA 4 point 66-48 +18
2. Mexico 2 point 53-55 - 02
3. Grønland 1 point 55-63 - 08
4. Cuba 1 point 52-60 - 08
AAMMA ATUARUK Assammik arsarneq: VM-mut anngunniulluni unamminermi siullermi kalaallit ajorsarput
Cubap isertitsinera kingulleq atortussaatinneqanngilaq dommeriusut naliliimmata piffissaliunneqartoq naareersoq arsaq isersimasoq.
Unamminerup aappaani USAp Mexicomut ajugaanera unammersuarnerit ingerlaqqinnissaannut aamma pingaaruteqarpoq.
- Kalaallit finalemut anngussinnaaniassagunik marlunngornermi unamminermi pinngitsooratik Mexicomut ajugaasariaqarput, Kurt Lauritsen KNR-mut ilisimatitsivoq.
- Aammali pissutsit allanngorsinnaapput Cuba USA-mut ajugaassagaluarpat. Taama pisoqassappat kalaallit aamma Cuba pointeqatigiilissapput taamalu pisoqassappat isertitatigut inissisimalluarnerit finalemut anngutissapput, Kurt Lauritsen nassuiaavoq.
Allat naliliinissaat Cubap piumasaraa
Kalaallilli finalemut anngussinnaanissaat ataannassappat Cubap naammagittaalliutaa unammersuarnermut ataatsimiititaliamit itigartinneqartariaqarpoq.
Cubamiut assammik arsartartut kattuffianni siulittaasoq Franklyn S. Guevara Balcazar marlunngornermi unnukkut tusagassiutinut nalunaaruteqarluni piumasaqarpoq naammagittaalliut arlaannaannulluunniit attuumassuteqanngitsunit suliarineqassasoq.
- Unammersuarnermi ataatsimiititaliami aqutseqataasut aamma Cubap Kalaallit Nunaatalu unamminerannut attuumassuteqarput taamaattorli naammagittaalliutitsinnut aalajangeeqaataasussaallutik, Franklyn S. Guevara Balcazar oqarpoq.
- Uagut pisussaaffigaarput piumasarissalugu IHF-ip malittarisassai malillugit arlaannaannulluunniit attuumassuteqanngitsut aalajangiisuussasut, Franklyn S. Guevara Balcazar oqarpoq.
Naammagittaalliut pillugu aalajangerneq pingasunngornerup ingerlanerani nalunaarutigineqassaaq.
Unamminerit marlunngornermi unnukkut nalunaaqutaq arfineq marlunut aalartissapput Cuba aamma USA unammissammata. Kalaallit aamma Mexicomiut unamminerat nalunaaqutaq qulingiluanut aallatissaaq. Unamminerit tamarmik KNR2-mi isiginnaarneqarsinnaapput.
