Kalaallit Danmarkimi radiortaavat: Nittartakkakkut katersuuffiussaaq

3-miit 1-imut kingumut kisitseriarluni ersaartaattoqarujussuarpoq.

Kalaallimmi Danmarkimi radiortaavata ippassaq marlunngornermi aallakaatitserngaarnera isiginnaartitsisarfimmi Nordisk Teaterlaboratorium - Odin Teatretimi Holstrebromiittumi malunnartinneqarmat najuuttorpassuit ersaartaapput.

Tamanna Nordisk Teaterlaboratorium - Odin Teatretimi init ilaanni nivinngaassukkanik aappalaartuleeralersorsimasami kaffillernertalimmik, kalaattoornertalimmik paggatsitsinertalimmillu malunnartinneqarmat, inuit 100-t tungaannut amerlassusillit najuupput.

Kalaallit Danmarkimi radiortaavat, Radio Inuna, sumiikkaluaraanniluunniit nittartakkakkut naalaarneqarsinnaasunik podcastimik tusarnaagassiortassaaq.

Tusarnaagassiortartut Radio Inuna kalaallinut digitalimik katersuuffiutikkusukkaat, Radio Inunamik suliniummi aqutsisoq, Arnannguaq Gerstrøm, KNR-imut oqarpoq.

- Oqaatigilluaannarlugu radiokkut aallakaatitsisassanngilagut. Tassa podcastimik nittartakkakkut naalaarneqarsinnaasunik tusarnaagassiortassaagut, nittartakkakkut attaveqatigiittarfiisigut katersuuffiussaagut soorunamilu paasissutissanik nittartakkakkut aallerfiusinnaassaagut.

Radio Inunap aallakaatitsivia isiginnaartitsisarfiup Holstrebromiittup quersuatoqaani allanngortitikkamiippoq, Danmarkimili suni tamani immiussanik podcastimik tusarnaagassiortassalluni.

-  Danmarkimi angalaartassaagut. Tusaamaneqarluartortavut soorunamilu kalaaleqativut allat oqaloqatigisassavagut, taamaammat Danmarkimi kalaalerpaaluit ukioqatigiiaanngisitaartut naapittassavagut. Qilanaarpugut, Arnannguaq Gerstrøm oqarpoq.

Podcastimik sapaatit akunnerannut marloriarluni aallakaatitsisassasoq - akulikinnerusumilli aallakaatitsisalerumaartoq

Radio Inuna kalaallisut Danmarkimi radiokkut aallakaatitassiornermut 7 millionit koruuninik 2025-p tungaanut atugassanik aningaasaliiffigineqarpoq.

Ukiuni pingasuni katillutik 231 tiiminik sivisussusilinnik aallakaatitsisassallutik, tusarnaagassiortartut danskit illussaarsuarnut kultureqarnermullu aqutsisoqarfiannut qinnuteqaamminni allapput. Tassa Radio Inuna ukiumut qaammatini qulini sapaatit akunnerannut akunnerni marlungajanni aallakaatitsisassaaq.

Qinnuteqartuni itigartitaasut ilaasa tamanna isornartorsiorpaat.

Danskilli illussaarsuarnut kultureqarnermullu aqutsisoqarfiat aallakaatitassarsiortussarsiornermini aallakaatitsinermut sivikinnerpaaffiliinngilaq. Tusarnaagassiortartulli aallakaatitserusussuseqarluaqisut, Radio Inunamik suliniummi aqutsisoq Arnannguaq Gerstrøm erseqqissaavoq.

Tusarnaagassiortartut aallartinissareeriarunik podcastimik akulikinnerusumik sivisunerusumillu aallakaatitsisalerumaartut, Arnannguaq Gerstrøm oqarpoq.

- Isiginnaartitsinermik misileraaviuvugut, misileraavillu alapernaaserfiullunilu ammasumik pissuseqarfiusarpoq. Radio Inunamilu taamaattuuvugut. Inunnik tikilluaqqusivugut, taammaammallu sivisunerusumik aallakaatitsisalerumaarpugut, taanna oqarpoq.

Radio Inuna podcastimik tusarnaagassialiaminik marlunngornerit sisamanngornerillu tamaasa aallakaatitsisassaaq.

Aallakaatitassiaat soorlu oqaloqateqarnernik, aliikkusersuinernik, ilisarititsinernik Danmarkimilu kalaallit avatangiisiini pisunut tunngasuusunik imaqartassapput.

Radio Inunallu tusarnaagassiortartui taamaaliorsinnaajumallutik Danmarkimi kalaallinut tamanut kaammattuuteqarput:

- Nittartakkakkut attaveqatigiittarfiisigut malinnaavigisigut. Allaffigitigut attaveqaqatigalutalu. Kissaatisi tusarusuppagut, maani Holstrebromi pulaartorerusuppatsigit aamma aggersarsinnaavatsigut Danmarkimi sumiikkaluarussiluunniit. Naapitta suulluunniillu oqaloqatigiissutigalugit. Inuit naapinnissaat qilanaareqaarput, Arnannguaq Gerstrøm oqarpoq.