Kalaallit Illuutaata ilaqutariinnik meerartalinnik kingunerlutsitsisimasunik ikiuineq salliutileraa
- Siusinaartumimmi ikiuineq qanoq pingaaruteqartigisoq nassuiarneqarujussuartariaqanngilaq.
Aarhusimi Kalaallit Illuutaanni tarnip pissusiinik ilisimasalik, Rikke Overgaard, taama oqarpoq.
Taanna Danmarkimi kalaallinik soorlu atornerluinermik, sininnaveernermik siooranermillu ajornartorsiutilinnik ulluinnarni oqaloqateqartarpoq.
Taannalu assigiinngitsorpassuarnik takusaqarlunilu tusagaqartarpoq. Danmarkimili kalaallit ilaat, ingammik kingunerlutsitsisimasut, tarnip pissusiinik ilisimasalimmit ikiorneqarnerminnik iluaquteqarluarsimasut tassaapput ilaqutariit meerartallit.
- Ilaqutariit nukangasunik meerartallit siunissaraagut. Taakkorpiaallu alloriarnissaannut ikiuineq sunniuteqarluartartoq paasinikuuarput. Sunniuteqarluartartunillumi suliaqarnerorusuppugut, Rikke Overgaard KNR-imut oqarpoq.
Kingunerluutit kingornunneqartartut
Taamaammat Aarhusimi Kalaallit Illuutaat tarnip pissusiinik ilisimasalimmik kikkunnulluunniit ikiorsiisarunnaarluni kalaallinut ilaqutariinnut meerartalinnut taamaallaat ikiorsiisalerniarpoq.
Rikke Overgaardimi Danmarkimi Aarhusimi Kalaallit Illuutaanni, allaallumi Danmarkimi Kalaallit Illuutaanni katillugit sisamaasuni, tarnip pissusiinik ilisimasalittut atorfeqartutuaavoq. Taassumalu pisariaqartitsiffiusuni sunnitueqarluartartunilu piffissartornissaa pingaaruteqartoq, Aarhusimi Kalaallit Illuutaanni pisortaq Tanja Nielsen KNR-imut oqarpoq.
Taassumalu piffissartorfigisariaqagai tassaapput ilaqutariit meerartallit.
Ataasiarluni arlaleriarluniluunniit nalaataqarnerloreernermi qaratsap timillu qisuariarpiloornerisigut kingunerlutsitsisoqarsinnaavoq. Soorlu:
- Aqqunarsimagaanni aqqunarneqarnissamilluunniit sioorasaarneqarsimagaanni.
- Toqusoqarsimatillugu imaluunniit toqutsinissamik sioorasaarisoqarsimatillugu toqunneqarnissamilluunniit sioorasaarneqarsimagaanni.
- Nammineq killissanik inuilluunniit allat timikkut tarnikkullu killissaannik qaangeerujussuartoqarsimatillugu, imaluunniit taamaaliornissamik sioorasaarisoqarsimatillugu.
Kingunerlutsitsinermi atugaakkajuttut:
- uippakajaarneq sioorasarnerlu
- sinnattupilunneq nalaassimasanilluunniit eqqaasaqartarneq
- akulerusimannginneq inussiorpiarunnaarnerluunniit
Tusarfik: Traume.dk
Danmarkimi kalaallit ilaqutariit ilarpaalui soorlu persuttaannermik atornerluinermillu ajornartorsiutilinnik angajoqqaaqarput, kinguaassiuutitigut atornerlugaasimasuupput, aliaasuuteqarput, imminorsimasunik nalunngisaqarput nappaateqarlutilluunniit.
Taakkualu toqqissinissaat aalaakkaasumillu inuuneqarnissaat siunertaralugit kingunerluutigisaminnik qaangiinissaannut aqqutissiuunneqarnissaat Rikke Overgaardip pingaartippaa.
- Inuusuttut ilarpaalui ilinniakkamik naammassinninniapiloortarput ulluinnarniluunniit inuunerminni artorsaateqarput. Taakkua sioorarujussuarnermik aallaveqakkajuttumik uippakajaarnertik kingunerlutsitsisimanertilluunniit pissutigalugu makinniapiloortarput inussiorusussuseqartaratillu, Rikke Overgaard oqarpoq.
Tarnillu pissusiinik ilisimasalimmit akeqanngitsumik kinaassutsimillu isertuussilluni ikiorneqarneq ingammik ilaqutariinnit meerartalinnit pisariaqartinneqarpoq.
- Kingunerluutit kingornunneqakkajupput. Kingunerluuteqarnerup ilutigisaanik timikkut tarnikkullu qisuariarnerit qaangernissaannut ikiorneqanngikkaanni imminut aqunniapiloornarsinnaallunilu meeqqanik toqqissisimatitsiniapiloornarsinnaasarpoq, Rikke Overgaard oqarpoq.
Aappaagu aningaasaliisoqartarunnaassasoq
Danskit isumaginninnermut ministereqarfiat Aarhusimi Kalaallit Illuutaata tarnip pissusiinik ilisimasalimmik ikiorsiisarneranut tunngatillugu ukiumut 1 millionit koruunit missaannik aningaasaliissuteqartarpoq, 2023-lli naanerata tungaanuinnaq.
Tamatuma kingorna qanoq iliortoqassanersoq suli paasineqanngilaq. Aarhusimi Kalaallit Illuutaata aningaasaateqarfinnut tarnip pissusiinik ilisimasalimmik annertusisamik ikiorsiinermut qinnnuteqarsinnaanngornissani massakkut neriuutigaa.
Akunnialuinnarnimmi ikiorsiineq aamma sunniuteqarluartartoq, Rikke Overgaard isumaqarpoq.
Tamannami Aarhusimi Kalaallit Illuutaata kalaallinut ilaqutariinnut kingunerlutsitsisimasunut ikiorsiineq pillugu misissuinermi aamma erserpoq. Angajoqqaarpaaluimmi siooranermik qaangiinissamut ikiorserneqareernerminni suliffittaarsimasut ilinniakkamilluunniit naammassinnissimasut misissuinermi ilaatigut erserpoq.
Taakkualu nersortariaqartut, Rikke Overgaard oqarpoq. Ingammik inuunermi nalaassimasaat qiviassagaanni.
- Kalaallit inuusuttut meeqqallu nersoqaakka, ikiorserneqarujussuanngikkaluarlutimmi inooriaatsimik allannguinikkut anguniakkamik ilaannik piviusunngortitsinissamut sapiissuseqarmata.
