Kalaallit Nunaanneersut Danmark-imut tikikkunik misissortittariaqanngillat
Ullut arlaqanngitsut qaangiuppata Danmark-imut tikittut Danmark-imi najugaqanngitsut tamarmik coronamut misissortissimanermik uppernarsaammik takutitsisussaapput. Tamanna akunnerit arlaqanngitsut matuma siorna nalunaarutigineqarpoq, decembarillu 27-anni atuutilissalluni.
Tamannali Kalaallit Nunaanneersunut Savalimmiuneersunullu taakkunanngaanniit Danmark-imut tikittunut atuutinngilaq. Tamanna Danmark-imi peqqinnissamut ministereqarfiup KNR-imut nalunaarutigaa.
Kalaallit Nunaannut tikinnermi malittarisassat
* Kalaallit Nunaannut tikikkaanni naammassilluni akiuussutissinneqareersimassaaq.
* Tamatuma saniatigut tunillatsissimannginnermik uppernarsaammik annerpaamik akunnernik 48-nik qanganisaassusilimmik takutitsisinnaassaaq.
* Aqqutaani aamma timmisartumi mittarfinnilu qanimut assiaqutaqassaaq.
Najoqqutaq: KNR
Naalagaaffeqatigiinnut taanna atuutissanngilaq, nalunaarummi allaqqavoq.
Allalli tamarmik Danmark-imut isertigatik PCR-testimik akunnernik annerpaamik 72-inik qanganisaassusilimmik misissortissimanerminnik uppernarsaateqassapput imaluunniit quick-testimik annerpaamik akunnernik 48-nik qanganisaassusilimmik nassataqassapput. Tamanna aamma Covid-19-imut akiuussutissamik kapitissimasunut atuuppoq.
AAMMA ATUARUK Tamaat isigalugu: Coronavirus pillugu killiffik
Danmark-imi najullit namminneq aalajangissavaat, aallartigatik misissortissanerlutik imaluunniit tikinnerminniit akunnerit 24-t qaangiutsinnagit misissortissanerlutik. Tamannali tassa Kalaallit Nunaanneersunut Savalimmiuneersunullu atuutinngilaq.
Malittarisassat unioqqutikkaanni akiliisitaasoqarsinnaavoq. Akiliut 3.500 koruuniuvoq.
Malittarisassat maannaagallartoq sapaatip akunnerini pingasuni, tassa aappaagu januaarip 17-iata tungaanut atuukkallassapput.
Ullup kingulliup ingerlanerani 12.000-it sinnerlugit tunillatsipput
Sapaatip akunnerini kingullerni Danmark-imi coronamik tunillatsittut amerliartuaarnikuupput. Ulluni kingullerni marlunni ullormut tunillatsittartut 13.000-it sinneqattaarpaat, ullumilu nalunaarsukkat 12.467-it coronamik tunillatsissimallutik. Statens Serum Institut taamatut Ritzau-imut nalunaarpoq.
Napparsimmavinnut unittut ippassarmit 17-inik ilapput, 570-innngorlutik. Ukioq mannali unittut suli siornarnit appasinnerungaatsiarpoq.
Danmark-imi tuniluuttoqaleruttornerani tikittunut malittarisassat nutaat taakkuinnaangillat.
Inuit aamma 18-it 39-illu akornanni ukiullit akiuussutissamik pingajussaannik, boosterimik taagorneqartumik, kapitinnissaat siuartinneqarpoq.
Tassa inuit taamatut ukiullit aappassaanik kapitinnerminniit ullut 140-t qaangiuppata pingajussaanik kapistissinnaalissapput.
Boosterimik kapitinnissaq Kalaallit Nunaanni 40-nik ukioqalereersimasunut siuartinneqareernikuuvoq.
