Danmarkip Korea Kujalleq nunatsinni ilisimatusarnissamut isumaqatigiissuteqarfigigaa

Korea Kujallermiut dronenik aqutsinissaminnut piginnaaneqarluarput, taamaammallu qallunaat naalakkersuisuisa suleqatiginissaannut aallarniipput.

Allattoq Malik Brøns

decembarip 10-at 2021 15:44

Qallunaat Nunaat Korea Kujallerlu piffissami aggersumi ilisimatusarnissamut qanimut suleqatigiilissapput.

Qallunaat Ilinniagaqarnermut ilisimatusarnermullu ministeriata Jesper Petersenip (S) Korea Kujallermilu suleqataata Seong-Hyeok Moonip Issittumi ilisimatusarnissamut isumaqatigiissummik atsioqatigiipput.

Ilinniagaqarnermut Ilisimatusarnermullu ministeriaqarfik tusagassiutinut taamak allagaqarpoq.

- Nunarsuaq kiatsikkiartorpoq, issittortaanilu silap pissusiata allanngoriartornera malunnarluinnarpoq. Sermersuup aakkiartornera Kalaallit Nunaannuinnaq kinguneqartitsinavianngilaq, kingusinnerusukkulli Qallunaat Nunaata sineriaani immap qafaanneranik kinguneqartitisussaavoq.

Dronenik aqutsinermut siuttuupput

Qallunaat naalakkersuisuisa silaannaap pissusiata allanngoriartornera silaannarmiit annertunerusumik alaatsinaaffigerusuppaat, ministeriaqarfillu isumaqarpoq Korea Kujallermiut silapiluttumi dronenik aqutsinermut siuttuusut.

- Qallunaat Nunaata Korea Kujalliullu ilisimatusarnikkut suleqatigiilluarnerat isumaqatigiissutip annertusiallatsippaa. Ilisimatuut DTU Space-imeersut Korea Kujallermi suleqatitik Issittumi silap pissusiata allanngoriartornerata misissueqatiginissaanut aallartisaaleruttorput, taama oqarpoq Ilinniartitaanermut Ilisimatuutullu Misissuinermut ministeri Jesper Petersen.

Qallunaat Korea Kujallermiullu Issittumi ilisimatusarnerat Kalaallit Nunaata iluaqutigissavaa ”silap pissusiata allanngoriartorneranik paasinninneq annertusissammat”, taama isumaqarpoq Ilinniartitaanermut Ilisimatusarnermullu ministeriaqarfik.

Nutaarsiassami kukkunermik nassaarsimaguit uunga allaffigineqarsinnaavugut.