Kalaallit Nunaata imartaata naqqa ilisimaneqanngitsoq maanna saqqummiunneqalersoq

Kalaallit Nunaata avataata naqqa annertoorujussuuinnarani aamma annikitsuaraannarmik ilisimasaqarfigineqarpoq.
Tassani paasissutissat iluaqutigalugit Kalaallit Nunaata aningaasaqarniarnera pitsanngorsaannarnagu aamma uumasunut sunnertiaqisunut iluaqutaasinnavoq.

Taamaammat immap naqqa assiliortorlugu Pinngortitaleriffik aallartippoq.

Mikisunnguakkaarlugu tamanna assiliortorneqarpoq, siunissami aalisartunut iluaqutaaginnarani aamma koraalit aalisakkallu suffiffigisartagaat illersorneqarsinnaammat.

Iluaqutissaq sumiippa?

Misissugassap annertoqisup aallarniutaa inissereerpoq, taannalu Qeqertarsuup Tunuani Kitsissuarsuit avataaniippoq 600 km2-itut annertussuseqarluni.

Suliariniakkami siuttuusoq ilisimatooq pinngortitaleriffimmeersoq Diana Krawczyk nassuiaalluni oqarpoq, Kalaallit Nunaanni imartap naqqata assiliortornissaa sooq pisariaqarnersoq.

- Immap naqqanut tunngasunik paasissutissarpassuarnik assilisat imaqarput. Soorlu paasisinnaalissavarput, immap naqqaniit qaqqarsuaqarnersoq, manissuinnartaqarnersoq, aqitsumik nateqarnersoq? Taavalu sumi koraalit, kinguppaat, uillut allallu uumasut sumiinneri paasisinnaalissallutigu, Diana Krawczyk oqarpoq nangillunilu:

- Tamatumuuna aalisartut paasisinnaalissavaat, sumi aalisarunik iluarnerunersoq sumilu aalisarnaveersaartariaqarnerlutik.

Neriuutigineqartoq tassaavoq, aalisartut namminneq misilittakkatik immaqalu immap naqqanik assit atorlugit soorlu kinguppannik qaleralinnilluunniit pisaqarluarsinnaanerulersinnaanerat takuneqarsinnaalissaaq.

Assimi takuneqarsinnaavoq, Qeqertarsuup Tunuani nuna mnalunaarsorneqaarnikuusoq.

Nungusaataanngitsumik aalisarnermut tapiissut pingaartoq

Kalaallit Nunaata avataa uumassusilinnik ulikkaarpoq.
Kinguppaat, saarulliit qaleraliillu kikkut tamarmik nalunngisatsitut uumasuupput, aammali qitupeqqat (søanemoner) koraalit qalipaatigeqisut aamma nassaassaallutik, samani samani itisoorsuarmi.

Assiliisariaaseq una atorlugu meterimik ataasermik eqqoqqissaartigalugu sumiissusersisoqarsinnaammat, aalisarnerup nappanneqarsinnaasuunissaanut iluaqutaassaaq - tamannalu aalisakkanik avammut tuniniaanermi pingaaruteqrpoq.

- Immap assinga taanna atorlugu sortaani illersortariaqalinnik sunnertiasioqarnersoq takuneqarsinnaassaaq. Tamakkua tassaasinnaapput, nungusaataanngitsumik aalisarniaraanni, qalerallit imaluunnit koraalit qitupeqqalluunniit suffiffigisartagaannik illersuiniarluni uiarterisinnaanermut, Diana Krawczyk oqarpoq.

Isorartussusiliinermi assit katitinneranni assit tullii aamma Qeqertstsuup Tunuani uuttortarneqassapput.

Kalaallit Nunaata imartaata tamarmi assilineqarnissaanut suli ukiorpassuit ingerlassapput.