Kangerlussuarmi imeqaqqililersoq

Kangerlussuarmi innuttaasut ilaat Mittarfeqarfiit Nukissiorfiillu akornanni paaseqatigiinnerluttoqarnera pissutigalugu imeqarsimanngillat, taama aviisi Sermitsiaq.ag allappoq.

Nukissiorfiit pisortaat Cicilie Senderovitz aamma Mittarfeqarfiit pisortaat Henrik Estrup, Ineqarnermut, Attaveqaasersuutinut Naalakkersuisoqarfimmit kiisalu Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfimmit atorfillit ullumi pingasunngornermi, nalunaaqutaq aqqanermut pinasuartumik ataatsimiipput. Imermillu pilersuinerup amigaataaneranut aaqqiissutaagallartussamik erngertumik nassaarput.

Mittarfeqarfiit Nukissiorfinnut ikiuillutik imermik assartuissummit imermut tankimut pilersuinissaat aalajangerneqarpoq.

- Nukissiorfiit atuisartunut imermik pilersuinissaq akisussaaffigaat, kisianni suliassamik ikiorlugit imermik assartuissummik ingerlatsisinnaasunik sulisuliissaagut, Mittarfeqarfinni ingerlatsinermut pisortaq, Niels Grosen oqarpoq.

AAMMA ATUARUK Kangerlussuarmi angerlarsimaffiit ilarpaalui imeqanngitsut

Kangerlussuarmi, Narsarsuarmi Qaarsunnilu inuinnarnut imermik pilersuineq Mittarfeqarfinnit isumagineqartaraluartoq Nukissiorfiit ukiup nikinneranni akisussaaffigilermagu ajornartorsiutaasoq pinngorpoq.

Kangerlussuarmili suliffeqarfiit taakku marluk paarlaanneranni arlaatigut ajutoortoqarpoq.

- Tigusinermi ajoraluartumik ersarissumik ajutoortoqarpoq. Innuttaasunut tamanna ajuusaarutigilluinnarparput, Nukissiorfiit pisortaat, Cicilie Senderovitz oqarpoq.

Paaseqatigiinnerlunneq pillugu erseqqissaaneq amigartoq

Paarlaattoqarnerani suna ajutoorsimanersoq suli erseqqissarneqanngilaq, kisianni tamanna illuatungeriit marluk akornanni paaseqatigiinnerliortoqarneranik pissuteqarpoq.

- Immikkoortumi matumani ataasinnguamik paaseqatigiinnerliortoqarpoq. Sapaatip akunnerata tulliani paaseqatigiinnerliorneq qanoq pinngorsimanersoq misissorluassavarput.

- Paaseqatigiinnerliortoqarnera ajuusaarnarluinnarpoq, tamatuma kingunerisassai annikillisinniarlugit sulissuteqarpugut, Niels Grosen oqarpoq.

Kangerlussuarmi kingullermik decembarip 29-anni imermik tankinut ingerlatsisoqarsimanera tamatumalu kingorna ingerlatsisoqaqqissimannginnera imermik amigaateqalernermik kinguneqarpoq.

- Nukissiorfiit imermik pilersuinermik ukiortaap kingunitsianngua nangitsinissaat naatsorsuutigigaluarparput, ingerlatsinermut pisortaq oqarpoq.

Mittarfeqarfiilli Nukissiorfinnut maanna ikiuullutik Kangerlussuarmi imermik pilersuigallassaaq, sumiiffiillu tamarmik kingusinnerpaamik unnugu imeqaqqilissallutik.

- Nukissiorfinnut isumaqatigiissutigaarput januaarip sinnera ikiuukkallassalluta. Nukissiorfiit qaammatip tullianut aaqqiissummik ataavarnerusumik inissiisimanissaat naatsorsuutigaarput.