KANUNUPE: Nunaqarfiit tamarmik qaammataasamut attavilinnik oqarasuaasersorneqartariaqarput

Nunatsinni tamarmi nunaqarfippassuit affaannit ikinnerusut qaammataasanut attavilinnik oqarasuaateqarput.

Eridiumilik aallarsimappat ajuilluni ajussooq

Tunumi qanittukkut piterarmat Tiilerilaaq sapaatip akunningajaani attaveeruppoq. Tiilerilaarmiut avammut attaveqarsinnaajunnaarput pisiniarsinnaajunnaarlutillu.

Takku ilaat kommunimi sulisoq Kristian Sinngertaat attaveqaatit pillugit taamani ima oqarpoq:

- Napparsimmaveqarfimmiit pingitsuueqqissaartumik pisariaqartinneqarpoq. Eridiumeqartoq aallarsimappat, allatut ajornartumik ajuilluni ajussaaq.

Ajutoortoqartillugu atoriaannarmik qaammataasakkut oqarasuaateqartariaqarput

Naalakkersuisut ajutoortoqartillugu atoriaannarnik qaammataasakkut attavilinnik nunaqarfinni tamani oqarasuaasersuisariaqartut KANUNUPE-p siulittaasua Karl Petersen isumaqarpoq.

- KANUNUPE-mi Iridiumit pillugit oqallisingaatsiarpugut. Ilaatigut Tunumi piterarnerata kingorna piffissami sivitsortumi inuit illoqarfimmut attaveqarsinnaajunaarsimallutik - taanna eqqartorparput. Kisiannili aamma nunatta sineriaani aamma taamatut attaveeruttoqartartoq. Taamaammat nunaqarfiit Iridiumimik peqalertariaqartut.

Oqarasuaammik qaammataasakkut attavilimmik sianerneq minutsimut 8 koruuneqarpoq. Taamaammat pisortat namminneq peqartariaqartut Karl Petersen oqarpoq.

-Pingaartutut isigaarput pisortat taamatut attaveqaatitigut ajornartoornermi, ajornanngippat sioqqutsisumik peqareertariaqartut. Avinngarussimasuniittut napparsimasoqarsimappat imaluunniit piteqqamik eqqugaalluni arlaatigut annertuumik kingunipiluttoqarsimappat, ingerlaannartumik attaveqarsinnaasariaqarmata.

Karl Petersen KANUNUPE-mi siulersuisoqatinilu maanna Nuummiittut, nunaqarfiit tamarmik qaammataasakkut attavilimmik oqarasuaateqalernissaat Naalakkersuisunut oqaloqatiginnissutigaat.

-Taakkua aallartereerneqartariaqarput ukiuni tulliuttuni aningaasalersuinikkut. Ajunaarnersuarnik pisoqartarpoq, taamaammat pisut sukkanerusumik iliuuseqarfigineqarnissaat uagut Kanunupe-miit kissaatigaarput.

Oqartussat nunaqarfiit affaanit ikinnerusuni qaammataasakkut oqarasuaatillit

Nunaqarfiit affaanit ikinnerit qaammataasakkut oqarasuaateqarput Kommunit nunaqarfittaminnut qaammataasakkut attavilinnik oqarasuaateqartitsinersut aperaagut.

Avannaata kommunia katillugit 17-inik Iridiumeqarpoq, taakkunannga arfineq pingasut nunaqarfinni atorneqarput.
Taakku saniatigut Uummannap Sullua tallimanik qaammataasanut attavilinnik oqarasuaateqartitaavoq.

Kommuni Qeqertalik, Qeqqata Kommunia Kommuni Kujallerlu nunaqarfittaminnut qaammataasakkut attavilinnik oqarasuaateqartitsinngillat.

Kommuneqarfik Sermersuup nunaqarfiini arfineq pingasuni Isortoq, Kuummiut Sermiligaarlu qaammataasakkut attavilinnik oqarasuaateqarput, sinnerilu peqanngillat.

Avannaata Kommunia 25-nik nunaqarfeqarpoq. Kommune Qeqertalik, Qeqqata Kommunia Kommune Kujallerlu katillugit 25-nik nunaqarfeqarput.