Tusarfiit: Iran sakkunik Ruslandimut pilersuerusulluni neriorsuivoq

Timmisartuaqqanik ungasianiit aquttakkanik Ruslandimut nassiussisoqassasoq, Iraniminngaanniit tusarfiit oqaatigaat. Ukrainep Iranimut attaveqarnini kipinialersaarunarpaa.

Allattoq Ritzau

oktobarip 18-at 2022 15:13

Nutserisoq Jaaku Lyberth

Qaartartunik timmisartuaqqanillu ungasianiit aqunneqartartunik Ruslandimut pilersuinissamik, Iran Ruslandimik isumaqatigiissuteqarpoq. Timmisartuaqqat ungasianiit aquttakkat atorlugit Rusland Ukrainemut qanittumi saassussigamik inuit arlaqartut toqutaapput.

Iranimi qaffasissumik atorfillit marluk iranimiullu aallartitaat marluk taama paasissutissiipput.

Iranimi præsidentip tullersortaa Mohammad Mokhber Moskvamut sapaatit akuuneri marluk matuma siorna tikeraarnerani taama isumaqatigiissuteqartoqarpoq.

Isumaqatigiissuteqartoqarsimasoq nunani killerni atorfilittamit pineqartumik ilisimannittumit uppernarsarneqarpoq.

AAMMA ATUARUK EU Ruslandimut nutaamik kinguneqartitsinermi mattussinissanik piareertitaqartoq

Sakkunik Ruslandimut nioqquteqarneq Naalagaaffiiit Peqatigiit mattussinissamik isumaqatigiissutaannik unioqqutitsinerunngitsoq, Iranimit oqaatigineqarpoq.

- Sumut atorneqarnissaat nioqquteqartup ajornartorsiutigisussaanngilaa. Nunat killiit Ukrainemik ajornartorsiornerannut arlaannaannulluunniit illersuinngilagut, Iranimiut aallartitaat oqarpoq.

Sakkut Ruslandimut erniinnaq nassiunneqarumaartut, Iraniminngaanit tusarfik alla oqarpoq.

Timmisartuaqqat ungasianit aqunneqartartut Shahed-136-t Iranimi sananeqartut atorlugit saapaatit akunnerini kingullerni Ukrainemut saassussisoqartarpoq.

Iran timmisartuaqqanik uangasianit aqunneqartartunik Ruslandimut nassitsisarsimannginnerarpoq.

Nutaarsiassami kukkunermik nassaarsimaguit uunga allaffigineqarsinnaavugut.