Killilersuutit atorunnaarnerat namminersortunit nuannaarutaasoq

- Nuaannaarujorujussuarpugut killilersuutit unitsinneqalermata unnuap-qeqqaninngaanniit, Ilulissani imerniartarfimmik neriniartafimmillu Naleqqamik piginnittuullunilu ingerlatsisoq, Heidi Jensen oqarpoq.

Imerniartarfik neriniartarfillu Naleraq 250-it missaannik amerlatigisunik isersimaffigineqarnissaminut akuerisaasoq, piffissami sivitsortumi taakkua affaannaat isersimasorisinnaanikuuaat.

Killilersuutit ukiuni kingullerni marlunngulersuni allanngorarnikooqisut namminersortumut pikkunarput.

- Pilersaarusiornissaq nalunartarnikuuvoq, killilersuutit ullormiit ullormut takkuteriasaartarmata, Heidi Jensen oqarpoq.

Atisaarniarfiutilik iluarisimaarinnittoq

Imerniartarfiit neriniartarfiillu isersimasinnaasut killileerunnerannik kisimik nuannaaruteqartuunngillat. Ilulissani atisaarniarfimmik nujaleriffimmillu piginnittup, sulisut sulinerminni qanimik asseqqaneqarunnaarnissaat tusarluarpaa.

Assi: Maline Geisler.

- Iluarpoq. Sulisunut aamma nujaleriffimmi pisiniarfimmilu iluaqutaassagami. Ulloq naallugu atortariaqartarami, taamannak aaqqiisoqarnialermat sulisut namminneq iluarisimaarpaat, Butik 56-p piginnittua, Maline Geisler oqarpoq.

Taassuma killilersuutit ajortuinnartut nalilinngilai. Sulisummi pisinianut imminnullu peqqissutsikkut sissuernerulertut atisaarniarfiuteqarlunilu nujaleriffiutilik isumaqarpoq.

- Ilinniutitummi taaneqarsinnaavoq. Uatsinnut sissuernerulerluta pivugut, tassami sullitagut uagullu sulinitsinni, Maline Geisler oqarpoq.

AAMMA ATUARUK Killilersuutit atorunnaartut: Qanermut assiaqut unnuap-qeqqanit atorunnaassaaq

Imerniartarfimmi neriniartarfimmilu isersimasinnaasut amerlassusaasa affaannaanerat aamma atorluarneqarpoq.

- Natilersornerit igalaat taarsersorneri anartarfiillu isaariamiit peernissaat taakkua tamarmik naammassiliivipput, Heidi Jensen oqarpoq.

Taamaammat Naalakkersuisut killilersuutit atorunnaarsippaat

Unnuap qeqqanut - pingasunngornermit sisamanngorninngorpat - qanermut assiaqutit eqqaavimmut isgissinnaavatit aamma neriniartarfiit, imerniartarfiit sutorniartarfiillu isersinnaasoqassusertik malillugu isertitsisinnaalernissaat qilanaarutigisinnaavat.

Corona pillugu killilersuutimmi atorunnaalersut, Naalakkersuisut pingasunngornikkut tusagassiortunik katersortitsinermi paasissutissiissutigaat.

Illoqarfinni annerni tuniluunneq annertunerpaaffissamineereersoq nakorsaaneqarfiup nalilerpaa. Tuniluunnerlu siaruarsimangaarmat killilersuuteqarnerit allannguinaviarnatik.

Tunumi nunatta sinnerani coronapassip sapaatip akunnerata siuliani atorunnaarsinneqarnerata nalaani qanermut assiaqutit atorunnaarsinneqareerput. Nunattalu sinnerani aamma atorunnaarsinneqartussanngorput.

Sumiiffiilli ilaanni qanermut assiaqutit suli atorneqassapput - soorlu napparsimmavinni nakorsiartarfinnilu.