Kinaassutsiminik isertuussisoq nunatta eqqumiitsulianik saqqummersitsivianut 50 millionit koruuninik tunniussaqartoq

Danmarkimi inuussutissarsiummik ingerlaqartoq namminersortoq Nunatta Eqqumiitsulianik Saqqummersitsiviata illutassaata sananissaanut 50 millionit koruuninik aningaasaliivoq.

Danmarkimi inuussutissarsiummik ingerlaqartoq kinaassutsiminik isertuusserusuttoq Nunatsinni Eqqumiitsulianik Saqqummersitsiviup Aningaasaateqarfiani siulittaasoq, Josef Tuusi Motzfeldt oqarpoq.

- Tunniussaqartoq aterminik taaserusunngilaq. Oqaatigisinnaavarali eqqumiitsulianik saqqummersitanik soqutigisaqartuusoq, Josef Tuusi Motzfeldt Sermitsiaq.AG-mut oqarpoq.

Piviusunngornissaa qanilliallattoq
Inatsisartut 2023-mut aningaasanut inatsimmi Naalakkersuisut eqqumiitsulianik saqqummersitsiviup sanaartornissaanut 50 millionit koruuninik immikkoortitsinissaat akuersissutigaat.

Nunatta Eqqumiitsulianik Saqqummersitsiviata sanaartornera 260 millionit koruuninik akeqassangatinneqarpoq.

Danmarkimi inuussutissarsiummik ingerlaqatartup kinaassutsiminik isertuussisup tunniussaqarneratigut Eqqumiitsulianik Saqqummersitsiviup piviusunngortinneqarnissaa taamaalilluni qanilliallappoq.

Josef Tuusi Motzfeldtip oqarnera naapertorlugu suliummut allanik tunissuteqartoqangajalersinnaavoq.

- Isumalluarpugut suliniut soqutigineqarluaannassappat ukioq manna naatinnagu naammattunik aningaasassaqaleriissasugut, taamaasillutalu sanaartornissaq aappaagu aallartereersinnaalissasoq, Josef Tuusi Motzfeldt oqarpoq.

Aningaasanik tapersersortinit 175.000-it
Air Greenland, GrønlandsBanken aamma Ittu.Net suliniummut katillugit 175.000 koruuninik siorna aningaasaliissuteqarput.

Eqqumiitsulianik saqqummersitsiviup aningaasaateqarfiup nammineq pigisaanik eqqumiitsulianillu allat pigisaanik katersinissaq, toqqorterinissaq saqqummersitsinissarlu siunertarai.

Saqqummersitsinerni kalaallit eqqumiitsuliaat kalaallillu eqqumiitsuliortut pingaarnerutinneqassapput.