Kinami corona tuniluuteqqilermat inuit nakorsaatinik pisiniuttut
Kinami coronap tuniluuteqqilernerata kingunerisaanik nakorsaatissaaleqiffinngorpoq.
Amerikami nutaarsiassaqartitsiviat CNN allaaserisaqarpoq.
Iisartakkat nipaallisaatit nuallunnermi ersiutinik annikillisitsisartut inunnit piumaneqarnerpaapput.
Nakorsaatinillu pingaartumik Hong Kongimi, Macauimi Taiwanimilu pisiniuttoqarpoq.
Pisiniarfiillu ilaanni tuniniaanerit killilersorneqartariaqalerput.
USA aamma Canada
Pisoq USA-mi Canadamilu pisumut assinguvoq, coronammi tuniluutipiloornera pissutigalugu nipaallisaatit pingaartumik meeqqanut piumaneqartorujussuupput.
Hongkongimi innutaasut nipaallisaatinik pisiniarujussuarnaveersaaqquneqarput. Peqqinnissarlu pillugu oqartussat uippallequsinngitsut, CNN allaaserisaqarpoq.
AAMMA ATUARUK Grønland ændrer regler: Du behøver ikke længere gå i isolation, når du har corona
Kinap coronamit ajornartoortitaarujussuaqqissinnaanera nunarsuarmi aningaasarsiornermik ilisimasalinnit aarleqqutigineqarpoq.
Tassami Kinami oqartussat corona pillugu sukannersumik maleruaqqusaminnik atorunnaarsitsereersullu coronavirusi Kinami sukkasuumik tuniluuteqqilerpoq.
Inuit millionit covid-19-imik aappaagu toqquteqarsinnaasut
Kinami coronamit toqquteqartoqarsimanngitsoq imaluunniit ikittuinnaat toqquteqarsimasut pisortatigoortumik nalunaarutigineqarpoq. Maleruaqqusanilli atorunnaasitsinerup kingunerisaanik toqusunik ikuallaavinni ulapaartoqarnerulerpoq.
Kinamiut millionit tungaanut amerlassusillit corona pissutigalugu toqquteqarnissaat immikkut ilisimasallit ilimagigaat Reuters allaaserisaqarpoq.
Coronap Kinami tuniluutipilooqqinneratigut coronap allanngoqqissinnaanera, nunarsuarmilu inunnut akiuussutissaqanngitsunut eqquipiloorsinnaanera nunani tamalaani peqqinnissaq pillugu immikkut ilisimasalinnit maanna aarleqqutigineqalersoq AFP allaaserisaqarpoq.
