KNAPK IWC-mi NAFO-milu alaatsinaatsunngorpoq
Nunatsinni aalisartut piniartullu kattuffiat KNAPK ukiorpassuarni atuutereerluni nunat tamalaat arfarniarnermut kattuffissuanni IWC-mi Atlantikullu avannaata kitaamiut aalisarnermut kattuffianni NAFO-mi kiisami alaatsinaatsutut inissisimalerpoq.
KNAPK-illu alaatsinaatsunngornini atorluassamaaraa siulittaasua oqarpoq.
-Ukiuni 70-inngulersuni kattuffiup ingerlasimanerani kalitsiinnarlutik ukununnga allanut peqataallutik ilaasarsimanerat uagut naammagisimanngilarput aammalu ataatsimeersuarnermi kingullermi taamatut alloriarnissaq pingaartissimavarput, ataatsimeersuareernerup kingorna.
Kattuffissuarni oqaaseqarsinnaatitaalersut
KNAPK, IWC-p NAFO-llu ukiumoortumik ataatsimiittarnerini oqaaseqarsinnaatitaalerpoq, taakkunanilu suleqatigiissitat ataatsimiittarnerinut aaqqissuussinernullu allanut alaatsinaatsutut peqataatitsisinnaalerluni. Assersuutigalugu nunatsinni aalisartunut piniartunullu pisassaassisutaasartut nammineerluni oqaaseqarfigisinnaalissagai Nikkulaat Jeremiassen oqarpoq.
AAMMA ATUARUK KNAPK-p saarulliit uumatitsivinni qungasut ernumassutigigai
- Soorlu aalisakkat sinerissatta qanittuani pisassat annertugisassaanngillat sineriarujussuaqarnitsinni, kattuffimmiit taanna ersarissumik suaarutigisajaarparput. Aammalu arferit pineqartillugit aamma pisassiissutaasartut annertugisassaanngillat. Taakkuninngaannaq isumalluutillit ilaatigut ukioq soqqajanngitsoq pisassaaruttarnerinut tunngasut, taakku soorunami annertuumik anngussuunniagassarivagut.
Nunani tamalaani ilisimaneqalerusupput
KNAPK allappoq, nunani tamalaani nammineq kattuffittut ersarinnerusumik saqqummertarnissani anguniassallugu, tamannalu kattuffiup siulittaasuata ima assersuuteqarfigaa:
-Sineriarujussuatsinniittut oqariartuutaat, assigiinngitsuugamik, nunarput sineriarujussuugami, isuaniit isuanut imaluunniit Kitaani Tunuanilu atukkat assigiinngitsorujussuullutik. Taakkua atukkat oqariartuutigisarnissaat, sumiiffiit pineqartillugit, taanna pingaarutilerujussuuvoq paasitsitsiniaassagaanni nunarsuarnioqataanermi.
AAMMA ATUARUK KNAPK-imi soraarsitsisoqaqqippoq: Kattuffik sanngiikkami, siulittaasoq oqarpoq
KNAPK naalagaaffeqatigiit aallartitaannut ilaaginnartartutut inissisimajunnaarluni alaatsinaatsutut oqaaseqarsinnaaleraluartoq nunarput sinnerlugu oqariartuutaasartussat naaperiaassutigisarnissaat pingaaruteqartoq Nikkulaat Jeremiassenip erseqqissaatigaa:
-Nalunngilara taaseqatigiittarneq eqqarsaatigalugu ikinnerussuteqaraanni aamma ajorsarnermik kinguneqartartoq. Taamaattumik taanna pitinnagu isumaqatigiinniarnerit assigiinngitsut eqqarsaatigalugit, soorunami naaperiaasinnaaneq aamma piussooq pingitsoorani, taanna oqarpoq.
