KNI-mi kannguttaatsuliorneq: Pisortaasimasup eqqartuussaanerani ullumi aalajangiisoqassasoq
Peter Grønvold KNI-mi pisortaanermini kannguttaatsuliorsimava?
Tamanna Eqqartuussisoqarfik Qeqqani ullumi aalajangiiffigineqassaaq.
Eqqartuussivimmi suliaq arlaleriarluni kinguartinneqarsimasoq ullaaq manna qulingiluanut nangeqqinneqassaaq.
Ilisimannittup pingasut nassuiaateqarnissaat amigaataavoq, tamatuma kingorna eqqartuussivimmi suliaq aalajangiiffigineqassaaq, unnerluussisussaatitaasullu qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaraat, Peter Grønvold Samuelsenilu pinngitsuunerarluni.
KNI-p pisortarisimasaa arnanut tallimanut, Namminersorlutik Oqartussat suliffeqarfiutaanni sulineranni kannguttaatsuliorsimanerarneqarpoq.
Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
Unnerluutigineqartut tamarmik eqqunngitsuunerarai
Eqqartuussivimmi suliaq februaarimi aallartinneqarpoq. Matumanilu unnerluutigineqartoq ilisimannittullu arfineq-marluk nassuiaateqarlutik.
Pter Grønvold sulisut arnat killissaannik qaangiisartutut pisortatut ilisimannittunit nassuiaatigineqarpoq.
AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Ilisimannittut nassuiaateqarnerminni atorfeqarnermi nalaanni kissaatiginngisaminnik attorneqartarlutik oqaatigaat.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvold Samuelsen pasilliutigineqartut tamarmik eqqunngitsuunerarpai.
Marloriarlugu kinguartinneqartoq
Eqqartuussivimmi suliap februaarip ulluisa aappaanni aalajangiiffigineqarnissaa pilersaarutaasimagaluarpoq.
Taamaattoqanngilarli, ilisimannittutummi nassuiaateqartussaq ataaseq coronavirusimik tunillatsissimavoq, taamaammallu eqqartuussivimmut takkussinnaasimanani.
Eqqartuussineq taamaalilluni aappassaanik kinguartinneqarpoq. Eqqartuussineq siorna decembarimi ingerlanneqartussat aallaqqaammut pilersaarutigineqaqqaaraluarpoq.
Nuummili mittarfiup quasarnera pissutigalugu illersuisut unnerluussisussaatitaasullu aallarsinnaanngimmata kingunartinneqarpoq.
KNI-p pisortarisimasaata politiinut unnerluutigineqarsimanera 2021-mi marsimi saqqummiunneqarpoq.
Tamatuma pinngitsiarnerani Peter Grønvold Samuelsen atorfimminit tunuarsimavoq.
Taanna KNI-mi ukiuni arfineq-marlunni pisortaanerusimavoq.
