KNI-mi pisortaanerusimasup eqqartuunneqarnissaa ullulerneqaqqittoq
KNI-p pisortarisimasaata, Peter Grønvold Samuelsenip, kannguttaatsuliorsimaneragaaneranut eqqartuunneqarnissaa ullulerneqarpoq. 2022-mi februaarip aallaqqaataani aappanilu eqqartuussisoqassasoq Qeqqata Eqqartuussisoqarfiata nalunaarutigaa.
Eqqartuussinissaq decembarip aallaqqaataani aappaanilu pisussaagaluartoq kinguartinneqarnikuuvoq. Unnerluutigineqartup illersuisua unnerluussisussaatitaasorlu Nuup mittarfiata quasappallaarnera pissutaalluni Sisimiunut anngutinngitsoormata.
Mittarfiup quasappallaarnerata saniatigut Nuuk qamittooqattaarpoq, qamittooqattaarnerani pissutaalluni eqqartuussineq videokkut ingerlanneqarsinnaasimanngilaq.
AAMMA ATUARUK Unnerluussisussaatitaasoq, illersuisoq, ilisimannittorlu: Eqqartuussivimmi suliassap kinguartinneqarnera uggornarpoq
Kinguartitsineq suliamut attuumassuteqartunit tamanit ugguarineqarpoq.
KNI (Kalaallit Niuerfiat)
KNI namminersorlutik oqartussat ingerlatseqatigiiffiutigaa, tassannga nioqqutissanik, ikummatissanillu pilersuisoqartarpoq.
Ingerlatseqatigiiffik sisamanik ingerlatsiveqarpoq, tassa Polaroil, Pilersuisoq, KNI Engros piginneqatigiiffillu allamit aqunneqartoq Neqi A/S.
KNI-p qullersaqarfia Sisimiuniippoq.
Arnaq pisortaanermut unnerluusseqataasoq kinguartitsineq pillugu KNR-imut siusinnerusukkut ima oqarpoq.
- Tarnikkut piffissami sivisuumi piareersarsimagaluarpugut. Suliamimmi taamaattumik unnerluutiginninneq oqitsuunngilaq. Taamaammat suliap tamarmi naammassinissaa qilanaarisimagaluarparput. Taamaammat pakatsinarpoq, suliami ilisimannittoq, kinaassutsiminik isertuusserusuttoq oqarpoq. Taassumali kinaanera KNR-ip ilisimavaa.
Illersuisuttaaq kinguartitsineq aamma uggoraa.
- Uggornartorujussuuvoq. Suliamit uannga ingerlariaqqinnissaq tamatta qilanaarisimagaluaripput isumaqarpunga. Sullitara suliamut atatillugu nammineq ilisimasanimik nassuiaateqarlunilu saqqummeerusuppoq, taamaammat eqqartuussisoqarsinnaaleqqipallannissaa qilanaaraarput, Peter Grønvold Samuelsenip illersuisua, Finn Meinel oqarpoq.
Pinngitsuunerartoq
KNI-mi pisortaanerusimasoq suliffeqarfimmi atorfeqarnermi nalaani arnanut katillugit tallimanut kannguttaatsuliorsimasutut unnerluunneqarpoq.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga
KNI-mi pisortaasimasoq kannguttaatsuliorsimasutut politiinut unnerluutigineqartoq marsimi saqqummiunneqarpoq.
Peter Grønvold Samuelsen tamanna sioqqutitsiarlugu atorfimminit soraarpoq.
Taassuma soraarneranut suna pissutaanersoq piffissami tassani saqqummiunneqanngilaq.
Peter Grønvold Samuelsenili suliffeqarfiup iluani innimiilliortoqarsimasinnaaneranik misissuisoqarnerata kingunerisaanik soraaqquneqaqqaariarluni KNI-mit soraarsinneqarsimasoq KNI-p siulersuisuisa nutaat oktobarimi paasissutissiissutigaat.
Peter Grønvold Samuelsen KNI-mi ukiuni arfineq-marlunni pisortaaneruvoq.
