KNR-ip nittartagaanut nutaamut tikilluarit

Knr.gl-ip ilusilersugaanera pisarnermisut isikkoqanngitsoq immaqa malugaat.

KNR-ip nittartagaa nutaamik ilusilersorneqareerluni ullaaq manna nutaanngorpoq. Nutarterniarnera pisariusimavoq, ilanngutassiamillu knr.gl-ip nutaanngoriitsiarnerani saqqummiineq siulleq pimmat qiimasaarrattoqarpoq.

- Nittartakkatta nutaanngornera nuannaarutigaara. Nutarterniarnera pisariullunilu imaannaanngilaq, KNR-ip nittartakkakkut nutaarsiassaqartitsiviata aaqqissuisua Christine Hyldal oqarpoq.

KNR-ip nittartagaata nutaanngoqqammertup ilusilersugaanera allannguuteqarujussuanngilaq, iserasuarfigisinnaasallu, tassa KNR-ip ilanngutassialiai, radioa toqqaannartoq, podcastimik tusarnaagassialiai TV-kkullu aallakaatitassialiai, pisarnertut iserasuarfigineqariaannaapput.

Tassa KNR-ip nittartagaata ilusilersugaanera allannguuteqarujussuanngikkaluarluni nutaanngorpoq.

- Nittartagarput nutaamik ilusilersorlugu nutarterparput. Taamaaliortinnata nittartakkatta imarisai tamarmik pisoqqamiit nutaamut nussorpavut, KNR-ip nittartagaanik nutarterinermi aqutsisoq Martin Chemnitz oqarpoq.

Atoruminarnerulertoq

KNR-ip nittartagaanik teknikkilerinermut immikkoortoqarfia ataatsimik sulisoqarpoq. Sulisoq taanna tassaavoq Martin Chemnitz.

Taassuma nittartakkakkut nutaarsiassaqartitsiviup tusagassiortui aaqqissuisualu suleqatigalugit nittartagaq nutarterpaa. TV-lerisut radiolerisullu nutarterinermi aamma isummersueqataapput.

KNR-ip Peytz Københavnimiittuusoq ukiuni kingullerni qulini nittartagalerisorivaa.

Sortarpiaamiuna taava nutaanngortoq?

- Nittartakkatta nutaanngornera KNR-imi suleriaasitsinnik oqilisaassivoq. Nutaanngornerali atuisunut qanoq sunniuteqassanersoq soorunami soqutigineruarput. Atuisunummi sutigut tamatigut atoruminarniarnerulerniartussaassaaq nutaarsiassallu atuaruminarniarnerulertussaassallutik, Martin Chemnitz oqarpoq nangillunilu:

- Nittartagarput ilanngutassiatsinnik kalaallisoortunik isigiarsuttunut aamma atuffassisortaarpoq. Ilanngutassianik danskisoortunik aamma atuffassisortaarumaarpoq. Tassa Oqaasileriffiup atuffataa nittartakkatsinnut atassusernikuuarput.

KNR-ip nittartagaa qarasaasiatigut mobilikkullu aamma atoruminarnerulerpoq.

Kiisami nutartertoq!

KNR-ip nittartagaata ilusilersugaanera ukiuni kingullerni qulini nutarterneqarsimanngimmat nutaarluinnarmik isikkulerlugu nutarternissaa piffissanngorsimavoq.

- Atuuffissamineereerpoq, nutarternissaalu sivisuumik pilersaarutaavoq. Isumannaallisaanermullu tunngasuni soorunami ataavartumik aamma nutarterivugut, Martin Chemnitz oqarpoq.

KNR-ip nittartagaanik nutarterineq teknikkilerinertaqangaatsiarpoq, ilusilersugaaneranilli aamma nutarterinertaqaaluppoq. Tassa nittartagaq takuminarnerulingaatsiarpoq.

- Siornatigornit takuminarnerulingaatsiarlunilu atoruminarnerulingaatsiarpoq. Aamma atuisutsinnut, Christine Hyldal oqarpoq nangillunilu:

- Ullutsinneersoorpasilerpoq.

KNR nittartakkaminik nutarterilluni 2021-mi novembarimi aallartippoq.