Asfaltiliorfimmik pisinissaq kommunalbestyrelsep akunnattuungasumik akuersissutigigaa
Borgmesteritut maanna tunuartussanngortoq Charlotte Ludvigsen asfaltiliorfimmik 20,875 millionit koruuninik akeqartumik pisinissamik akuersilluni ukiut marluk matuma siorna atsiorpoq.
Atsiorneq kommunalbestyrelsemit isummerfigineqarsimanngitsoq.
Isumaqatigiissut kommunalbestyrelsep marlunngormat ualikkut misissorpaa, pisinissamillu isumaqatigiissut allatut ajornartumik akuersissutigisariaqarlugu. Illuatungiliuttut Siumut kisiartaallutik naaggaatuupput.
- Aqqutit eqqortut atorneqanngimmata akuerinngilarput, Dorthe-Marie Mogensen-Fontain (Siumut), ataatsimiittarfimmi oqarpoq.
Borgmesterip isumaqatigiissut atsiugaa inatsisitigut pituttuisuuvoq, taamaattumillu kommunalbestyrelsemit itigartitsissutigineqarsinnaanani.
- Atsiorneqareertoq allatut ajornartumik akuerisariaqarparput, Inuit Ataqatigiinnersoq, Juaaka Lyberth marlunngornermi kommunalbestyrelsip ataatsimiinnerani oqarpoq.
Paasissutissat: Ineqarneq pillugu periuserineqartoq malittarisassanik unioqqutitsisoq
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
Periaaseq taanna kommunip 2015-imiilli inissianik pissarsiniarluni atortarsimavaa.
Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
Borgmesterip, Charlotte Ludvigsenip kommunimi ataatsimiititaliap isumagisimanngisaanik 20 millionit koruuninik atornissaq akuerinikuusimagaa siorna novembarimi saqqummersinneqarpoq.
Aningaasat atukkat kommunip inissiaatileqatigiiffiata Iserip inissianik 2025-mi pisisinnaanissaanut atorneqartussaapput.
20 millionit koruuninullu allanut tunngasumik suliamik politikkikkut aamma akuerineqanngitsunik ullumi saqqummertoqaqqippoq. Tamatumuuna asfaltiliorfimmik Munck Gruppenimit 2020-mi pisineruvoq, isumaqatigiissut taanna borgmesterip kommunalbestyrelsip suliamik isumaginninnginneratigut atsiorsimavaa.
Kommunip maannamut 7 millionit koruunit akilereerpai, sinnerisalu akilernissaat kommunalbestyrelsep allatut ajornartumik akuersissutigai. Kommunip 2,5 millionit koruunit ukioq manna aappaagulu 11,375 millionit koruunit akilissavai.
Borgmesterip Charlotte Ludvignsenip pisinissamik isumaqatigiissut aprilimi 2020-mi atsiorpaa. Tamanna kommunimi pisortaanerusimasorlu, Lars Møller Sørensenilu isumaqatigiissusiaraat. Isumaqatigiissulli Kommuneqarfik Sermersuumi politikerinit isummerfigineqarsimanngitsoq. Tassa imaappoq, pisinissaq pillugu politikerit akuersinissaminnut itigartitsinissaminnulluunniit periarfissaqarsimanngillat.
Tamanna kukkuneq Charlotte Ludvigsenip Kommuneqarfik Sermersuumi borgmesteritut tunuartariaqalerneranik kinguneqarpoq.
- Soorunami suliami taama pingaaruteqartigisumi kukkusoqarnera ajuusaarutigaara, kisianni kukkunerup maanna paasineqarnera pingaarnerpaavoq, taamaalilluta pissutsit aaqqiivigisinnaallutigit. Asfaltiliorfittaaq pisariaqartikkipput tamatta isumaqatigiissutigaarput, akilerneqarnissaalu maanna qulakkiissallutigu, borgmesteri, Charlotte Ludvigsen tusagassiuutinut nalunaarummi oqarpoq.
Kukkunersiuisut nalunaarusiaat isornartorsiuisoq
Kukkunersiuisut nalunaarusiaata kommunip inissiaqarnermut aqutsinerani ajornartorsiuteqangaatsiartoq qaammammi matumani siusinnerusukkut saqqummiuppaa.
Aalborg Universitetimi aningaasaqarnermik aqutsinermi professori, Per Nikolaj Bukh nalunaarusiamik aatsaat taama ilungersunartigisumik isornartorsiutigisumillu takusimanngisaannarluni oqarpoq.
Taassuma isumaqatigiissut politikkikkut suliarineqarsimanngitsoq qanoq ilungersunartiginersoq aperineqarami ilaatigut ima oqarpoq.
- Oqartoqarsinnaavoq inortuilaarsimagaanni kingornalu politikerinukarluni akueritikkaanni taava tamanna arlaatigut iluarsiivigineqartoq oqartoqarsinnaavoq.
- Kisianni tulleriiaarineq suli kukkuneruvoq. Politikerimmi isumaqatigiissuteqartoqareersimappat naaggaarsinnaassanngillat, isumaqatigiissullu utertinneqarsinnaanngikkuni aamma akuerineqarnissaa naatsorsuutigalugu piarereeruni taava tamanna naaggaarneqarsinnaanngilaq, Per Nikolaj Bukh maajimi oqarpoq.
