Kommune Kujallermi angerlarsimaffeqanngitsunut unnuiffissanik pingasunik pilersitsisoqassasoq
Angerlarsimaffeqangitsut pillugit Naalakkersuisut periusissatut pilersaarutaat nutaaq Kommune Kujallermi suleqataaffigineqarpoq. "Kikkut tamarmik pitsaasumik inuuneqarsinnaatitaapput"
Kommune Kujallermi angerlarsimaffeqanngitsutut nalunaarsukkat kommunimi innuttaasut amerlassusaat eqqarsaatigissagaanni amerlasuujusut Kommunimi Isumaginninnermi pisortaq isumaqarpoq.
-Tassami amerlapput, Nielsine Petersen oqarpoq.
Kommune Kujalleq angerlarsimaffeqanngitsut 106-iupput, taakkunannga 50-it Qaqortumiittut nalunaarsorsimapput.
Taamaammat angerlarsimaffeqangitsut pillugit Naalakkersuisut periusissatut pilersaarutaat Kommune Kujallermi suleqataaffigineqartoq, Nielsine Petersenip oqaatigaa.
AAMMA ATUARUK Naalakkersuisoq: Inuuniarnikkut ikiorsiissutit najugaqarfiillu angerlarsimaffeqanngitsunut iluaqutaassapput
- Tassani isumaqatigiissutaavoq uagut nammineq kommmunitsinni inissiamik imaluunniit illumik misissuissasugut. Aamma aalajangerparput kommunimi nammineq illut imaluunniit inissiat aallaavigalugit misissuissalluta.
Ukioq una naatinnagu piareerneqassangatinneqartut
Angerlarsimaffeqanngitsut nunatsinni sisamanut agguataarneqarput
- Takussaanerusumik angerlarsimaffeqanngitsuuneq, aqqusinerni, toqqini angerlarsimaffeqanngitsulluunniit unnuisarfianni sinittartut.
- Takussaannginnerusumik angelarsimaffeqanngitsut najukkamik allattorsimaffimmiinngitsut, kammalaatiminni ilaquttaminnilluunniit sinittartut.
- Angerlarsimaffeerunnissamut aarlerinartumiittut, soorlu inigisaminnik annaasaqariaannaasut, inuuniarnermikkut ilungersunartumik inissisimasut.
- Angerlarsimaferruuteriaannaasut, inuit angerlarsimaffillit, kisianni tarnimikkut napparsimanertik pissutigalugu kisimiillutik najugaqarsinnaanngitsut.
Qaqortumi Nanortalimmi Narsamilu angerlarsimaffeqanngitsut inissiani imaluunniit illuni unnuisarfeqalernissaat misissuiffigineqaleruttortoq, Nielseine Petersen oqarpoq.
- Neriuutigaarput tassa ukioq manna tamaasa illoqarfinni pingasuni pilersissinnaasallugit, apeqqutaapput taakkua iluarsartuussisussat taavalu pitsanngorsaasussat.
Kommune Kujallermi angerlarsimaffeqanngitsunut unnuisarfissat ukioq una naatinnagu piareerneqassangatinneqarput.
Kommune Kujallermi illoqarfinni pingasuni angerlarsimaffeqanngitsunut unnuisarfiit pilersaarusiorneqartut qanoq akeqassanersut massakkut oqaatigineqarsinnaangikkallartoq, Kommunemi Isumaginninnermi pisortaq nassuiaavoq.
