Naalakkersuisoq inatsisinik unioqqutitsineq pillugu: Kommunimut kinguneqartitsisoqassanersoq oqaaseqarfigissanngilara

Avannaata Kommuniata nunaqarfimmiut inuunerat navianartorsiortippaa. Taamaakkaluartorli naalakkersuisup, Kalistat Lundip inatsisinik unioqqutitsineq kommunimut kinguneqartitsissutaassanersoq oqaaseqarfiginianngilaa.

Allattoq Rune Hvistendal Kristiansen

februaarip 24-at 2023 15:24

Nutserisoq Connie Fontain

Avannaata Kommuniani nunaqarfiit arlallit qatserinermut atortorissaaruteqaratillu qatserisartoqanngillat, tamannalu nunatta upalungaarsimanissamut inatsisaanik unioqqutitsineruvoq.

Angutip 45-nik ukiullip, Nutaarmiuni februaarip qulingani illup ikuallannerani ajunaarnerata kingorna tamanna saqqummiunneqarpoq. Nunaqarfimmi inatsisit malillugit piumasaqaataasutulli qatserinermut atortorissaaruteqaranilu qatserisartoqanngilaq, taamaammallu innuttaasut allatut iliorsinnaannginnami illu ikuallattoq isigiinnartariaqarsimavaat.

Kommunip inatsimmik unioqqutitsineranut akisussaaffik tamaat tigullugu borgmesterip KNR-imut sisamanngormat oqaatigaa.

Aamma atuaruk Ikuallannermi ajunaartoqarnerata kingorna: Avannaata Kommuniata inatsit unioqqutippaa

Inatsimmik unioqqutitsisoqaraangat kinguneqartitsisoqartaraluarpoq. Uanili pisumi taama iliortoqassanersoq qularnartoq, nunatsinni upalungaarsimanermut akisussaasup, naalakkersuisup, Kalistat Lundip oqaatigaa. Apeqqummi tamanna maannakkut oqaaseqarfiginianngilaa.

- Uanga maannakkut taanna oqaaseqarfigissanngilara, kisianni pereersimasut ilinniarfigisariaqarpagut taakkualu maannakkut Avannaata Kommuniata toraagassamik pitsaasup tungaanut sammisumik iliuuseqalernera uanga taanna nuannaarutigaara. Ukua inatsisinik unioqqutitsisimanerup kingunissaa taakkua uanga maannakkut oqaaseqarfigissanngilakka.

Tassa imaappoq Avannaata Kommuniani nunaqarfimmiut kisimik kommune inatsisinik unioqqutitsisimanerarpaat.

IKUALLATTOQARNERANI AJUNAARTOQARNERA AAMMA INATSISINIK UNIOQQUTITSINEQ

Angut 45-nik ukiulik Upernaviup avannaani Nutaarmiuni februaarip qulingani ikuallattoqarnerani ajunaarpoq.

Tamatuma kingorna nunaqarfimmi inatsisitigut piumasaqaataasut malillugit qatserinermut atortorissaaruteqaranilu qatserisartoqanngitsoq KNR-ip paasivaa.

Nutaarmiut 60-it missaanni inoqarpoq, nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

Tamatuma saniatigut kommunimi annaassiniarnermut upalungaarsimasut qatserisartoqarnissaanik upalungaarsimanermilu atortorissaaruteqarnissaanik minnerpaamik piumasaqaatinik naammassinninnissaq akisussaaffigaat.

Piumasaqaataasullu ataallugit pissutsit ippata kommune pisussaavoq immikkut ittumik qinnuteqartussaalluni. Matumani soorlu atortunut assartuutissaqanngippat imaluunniit nunaqqatigiit agguaqatigiissillugit killeqarpata nunalluunniit isorartussusaa matumani akimmisaarutaalluni pisoqarpat.

Immikkulli qinnuteqartussaatitaaneq Avannaata Kommuniata qinnutigisimanngilaa. Tamatumunngalu Avannaata Kommuniani kommunalbestyrelsit ilisimasimanngimmassuk kommunip nunaqarfiini pingasuni qatserutinik qatserisartunillu amigaateqartoqarnera patsisiginerarneqarpoq. 2021-mi juunip qaammataani Ukkusissani illu ikuallammat inuit pingasut ajunaarput.

Tamatuma kingorna Avannaata Kommuniata upalungaarsimanissamut tunngatillugu akisussaaffigigaa uppernarsarneqarpoq, najukkani tamani akisussaaffigisamini isumaannaallisaanermut atortutigut qulakkeerinnittussaanini.

Allisiguk

Kommunit paasititsissasut

Kommunit malittarisassanik malinnissimannginnerat ersarittoq, Kalistat Lund oqarpoq.

Taamaammat Nunalerinermut, Imminut pilersornermut, Nukissiuutinut Avatangiisinullu Naalakkersuisoqarfiup nunatta upalungaarsimaneranik isumaginnittuusup Avannaata Kommunia oqaloqatigissavaa.

- Kommune upalungaarsimanermi naammattunik atortorissaarutissaqanngikkuni nalunaaruteqarnissani, malittarisassallu malinneqanngippata immikkut akuersissuteqarnissamut qinnuteqarnissani pisussaaffigaa. Taamaattoqanngilarli. Taamaammat qanoq inissisimanersoq paasiniarlugit attaviginiarpagut.

Naalakkersuisoqarfiup nunatsinni kommunit allat paasiniiaavigalugit aamma oqaloqatigigai ilanngullugu oqaatigaa.

- Illoqarfinni nunaqarfinnilu maleruaqqusat malinneqarpat? Paasiniaaneq taanna nangissavarput.

Nutaarsiassami kukkunermik nassaarsimaguit uunga allaffigineqarsinnaavugut.